లెజెండరీ సింగర్ గిరిజా దేవి కన్నుమూత

Posted: 10/25/2017 11:26 AM IST

ప్రముఖ క్లాసికల్ సింగర్, పద్మ విభూషణ్ అవార్డు గ్రహీత గిరిజాదేవి (88) కన్నుమూశారు. గుండెపోటుతో కోల్‌కతాలోని బీఎం బిర్లా హార్ట్ రీసెర్చ్ సెంటర్‌ ఆసుపత్రిలో చేరిన ఆమె.. పరిస్థితి విషమించడంతో మంగళవారం రాత్రి మృతి చెందారు. థుమ్రి క్వీన్‌గా ఆమె బాగా ప్రసిద్ధిగాంచారు.

బనారస్ సమీపంలోని ఓ చిన్న పల్లెటూరులో జమీందారు కుటుంబంలో పుట్టిన గిరిజాదేవి సంగీతాన్ని తన జీవితంగా మార్చుకున్నారు. లెజెండరీ సింగర్‌గా ఎదిగారు. 1972లో పద్మశ్రీ, 1989లో పద్మభూషణ్, 2016లో పద్మవిభూషణ్ పురస్కారాలను అందుకున్నారు. ఆమె అభిమానులు ఆమెను అప్పాజీ అని పిలుస్తుంటారు.

బెనారస్ గాయనిగా తన తుది శ్వాస విడిచే వరకు ఆమె పాడుతూనే ఉన్నారు. ఆరోగ్య సమస్యలతో ఆమెను పాడటం ఆపాలని వైద్యులు సూచించినప్పటికీ ఆమె అస్సలు వినలేదు. తినటం, నడవటం, శ్వాస పీల్చుకోవటం ఆగనప్పుడు తాను పాడటం ఎందుకు ఆపాలని ఆమె తరచూ చెబుతుండేవారు. గిరిజాదేవి మృతికి ప్రధాని నరేంద్రమోదీ సంతాపం ప్రకటించారు. ఆమె పాటలు జనాల హృదయాల్లో చిరస్థాయిగా నిలిచిపోతాయన్నారు.