‘గౌతమీపుత్ర శాతకర్ణి’కి ముహూర్తం ఫిక్స్

Posted: 04/20/2016 11:11 AM IST

Gautamiputra satakarni shooting on 22 april

‘డిక్టేటర్’ సినిమాతో 99 చిత్రాలను పూర్తిచేసుకున్న తెలుగు అగ్ర స్టార్ హీరో నందమూరి బాలకృష్ణ తన 100వ చిత్రాన్ని ఇటీవలే ఉగాది పండగ సంధర్భంగా ప్రారంభించిన విషయం తెలిసిందే. ప్రముఖ దర్శకుడు క్రిష్ దర్శకత్వంలో రూపొందనున్న బాలయ్య 100వ చిత్రానికి ‘గౌతమీపుత్ర శాతకర్ణి’ అనే టైటిల్ ఖరారు చేసారు.

అఖండ భారతదేశాన్ని పరిపాలించిన తొలి తెలుగు రాజు గౌతమీ పుత్ర శాతకర్ణి పాత్రలో నందమూరి బాలకృష్ణ కనిపించబోతున్నారు. మహానటుడు, నటరత్న ఎన్టీయార్ పోషించాలనుకున్న ఈ పాత్రను ఆయన సమయాభావం కారణంగా కార్యరూపంలోకి తీసుకు రాలేకపోయారు. ఇప్పుడు తన తండ్రి డ్రీమ్ ప్రాజెక్ట్ ను నందమూరి బాలకృష్ణ నూరవ చిత్రంగా చేస్తుండం విశేషం. ఈనెల 22న హైదరాబాద్ అన్నపూర్ణ స్టూడియోస్ లో ఉదయం ‘గౌతమీపుత్ర శాతకర్ణి’ ప్రారంభోత్సవం అంగరంగ వైభవంగా జరుగబోతోంది.

ఈ నాటి అఖండ భారతదేశానికి ఆనాడే అంకురార్పణ చేసిన రారాజు గౌతమీ పుత్ర శాతకర్ణి. అఖండ భారతావనిని పరిపాలించిన తొలి తెలుగు రాజైన గౌతమీ పుత్ర శాతకర్ణి జీవితాన్ని తెలుసుకుంటే రోమాంచితమవుతుంది. కృష్ణానదీ తీరాన అమరావతిని, గోదావరి తీరంలోని కరీంనగర్ జిల్లా కోటిలింగాల పల్లిని, మహారాష్ట్రలోని నాసిక్ సమీపంలోని ప్రతిష్ఠాన పురం ను రాజధానులుగా చేసుకుని పరిపాలన సాగించారు గౌతమీ పుత్ర శాతకర్ణి.

క్రిష్ దర్శకత్వంలో బిబో శ్రీనివాస్ సమర్పణలో రాజీవ్ రెడ్డి, సాయిబాబు ఈ సినిమా నిర్మిస్తున్నారు. దేవిశ్రీ ప్రసాద్ సంగీతం అందిస్తున్నారు. ఈ చిత్రానికి సంబంధించిన పూర్తి వివరాలను సినిమా ప్రారంభోత్సవం రోజున తెలియజేయనున్నారు.