ఎట్టకేలకు రజినీ చిత్రంపై ఓ క్లారిటీ వచ్చింది!

Posted: 06/02/2015 12:34 PM IST

Rajinikanth latest project director ranjith producer kalaipuli thanu officially confirmed

‘కొచ్చాడయాన్’, ‘లింగా’ వంటి భారీ సినిమాలు ఫ్లాప్ అవడంతో రజనీ కొన్నాళ్లు ఆందోళనల్లో మునిగిపోయారు. ముఖ్యంగా ‘లింగా’ వ్యవహారం తమిళనాడులో పెద్ద దుమారాన్నే రేపింది. ఆ మూవీని కొనుగోలు చేసిన డిస్ట్రిబ్యూటీర్లు పూర్తిగా మునిగిపోయామని, అందుకు నష్టపరిహారాన్ని చెల్లించాల్సిందేనని రచ్చరచ్చ చేశారు. దీంతో రజనీకి ఎన్నో ఇబ్బందులు ఎదుర్కోవలసి వచ్చింది. చివరికి ఆ సమస్య ఒక కొలిక్కి వచ్చింది కానీ.. రజనీ మాత్రం తన తదుపరి చిత్రం విషయమై తీవ్ర ఆలోచనల్లో మునిగిపోయారు. తన కెరీర్ లో ఎదురైన ఈ పరాభవాన్ని చెరిపేసుకోవాలంటే తనకు సక్సెస్ అందించే దర్శకుడి కోసం వెయిట్ చేశారు.

ఈ క్రమంలోనే యువ దర్శకుడు రంజిత్ పేరు తెరమీదికొచ్చింది. వైవిధ్యభరితమైన రెండు చిత్రాలను తెరకెక్కించి అనూహ్య విజయాలను సొంతం చేసుకున్న ఈ దర్శకుడు.. రజనీ కోసం కొత్త కథ తయారు చేసుకున్నట్లు ఆమధ్య వార్తలొచ్చాయి. ఆ కథను రజనీకి వినిపించగా.. అందుకు ఆయన గ్రీన్ సిగ్నల్ ఇచ్చినట్లు ప్రచారం జరిగింది. మరోవైపు.. దర్శకుడు శంకర్, రజనీ కోసం ‘రోబో-2’ చిత్ర కథను సిద్ధం చేస్తున్నారన్న వార్తలు వ్యాపించాయి. దీంతో.. రజనీ ఎవరి దర్శకత్వంలో నటించనున్నారోనని ఇన్నాళ్ళూ కన్ఫ్యూజన్ నెలకొంది. అయితే.. ఇప్పుడు రజనీ తదుపరి చిత్రంపై ఓ క్లారిటీ వచ్చేసింది. రజనీ ఎవరి దర్శకత్వంలో నటించనున్నారన్న విషయంపై అధికారిక ప్రకటన వెలువడింది.

మొదట్లో అనుకున్నట్లుగానే యువ దర్శకుడు రంజిత్ దర్శకత్వంలో రజనీ సినిమా చేయనున్నట్లు కన్ఫర్మ్ అయ్యింది. కలైపులి థాను నిర్మించే ఈ చిత్రానికి సంతోష్ నారాయణ్ సంగీతాన్ని అందించనున్నాడు. ఈ చిత్రం షూటింగ్ ఆగస్టు నుంచి రెగ్యులర్ గా నిర్వహించనున్నారు. కథను బట్టి ఈ సినిమా ఎక్కువ భాగం మలేషియా, హాంగ్ కాంగ్, థాయిలాండ్ లలో చేస్తారు. కొంత భాగం చెన్నైలోనూ నిర్వహించునున్నట్లు తెలిసింది. అయితే.. ఇందులో రజనీ సరసన నటించే హీరోయిన్ల పేర్లను ఇంకా వెల్లడించలేదు. ఏదైతేనేం.. మొత్తానికి రజనీ మూవీకి ఓ క్లారిటీ వచ్చేసింది.