Posted: 08/23/2012 05:45 PM IST

       ‘బెట్టింగ్ బంగార్రాజు’ తర్వాత అల్లరి నరేష్-సత్తిబాబుల కాంబినేషన్లో వస్తున్న సోషియో ఫాంటసీ చిత్రానికి ‘యముడికి మొగుడు’ అనే టైటిల్‌‌ ను ఖరారు చేశారు. 20 ఏళ్ల క్రితం చిరంజీవి ఇదే టైటిల్ తో సూపర్ హిట్ కొట్టిన సంగతి తెలిసిందే. నిర్మాత చంటి అడ్డాల చిరంజీవి మీద ఉన్న అభిమానంతో ఆయన పుట్టిన రోజునాడే (ఆగస్టు 22) ఈ టైటిల్ ను ప్రకటించారు. ఇందులో యముడిగా షాయాజి షిండే నటిస్తున్నాడు. ఈ సినిమాను దసరాకు విడుదల చేయనున్నారు.
        అల్లరి నరేష్‌, రిచాపనరు నాయకానాయికలుగా ఇ. సత్తిబాబు దర్శకత్వంలో రూపొందుతోన్న చిత్ర లోగో కార్యక్రమం తూర్పుగోదావరి అంతర్వేది దేవాలయంలో జరిగింది. లోగో ఆవిష్కరణ కార్యక్రమంలో చిరు బర్త్ డేని గ్రాండ్ గా సెలబ్రేట్ చేసుకున్నారు. నరేష్ కేక్ కట్ చేసి అందరికీ పంచారు. అనంతరం నరేష్‌ మాట్లాడుతూ, గతంలో చిరంజీవి గారి చిత్రం టైటిల్‌తో తాను చిత్రం చేయడం ఆనందంగా ఉందన్నారు. ఆయన నటించిన మరో చిత్రం 'అల్లుడా మజాకా'లోని 'అత్తో అత్తమ్మ కూతురో' పాపులర్‌ సాంగ్‌ను ఈ చిత్రంలో రీమిక్స్‌ చేశానని తెలిపారు.
       నిర్మాత మాట్లాడుతూ, ఈ చిత్రం తాజా షెడ్యూల్‌ను గత పదిరోజులుగా పాలకొల్లు పరిసర ప్రాంతాల్లో జరుపుతున్నామన్నారు. ఇందులో భాగంగా గోదావరి గట్టుపై ప్రత్యేకంగా నిర్మించిన సెట్లో గత మూడురోజులుగా హీరోహీరోయిన్లపై ఓ పాటను చిత్రీకరిస్తున్నామని చెప్పారు. ఈనెల 28వరకు పాలకొల్లు పరిసరాల్లోనే షూటింగ్‌ జరుపుతామని, హీరోకి సంబంధించిన గ్రామీణ నేపథ్య సన్నివేశాలను, ఇంకా ప్రతినాయకుడు భరణి సన్నివేశాలను అక్కడ తీయనున్నామని చెప్పారు. ఈ షెడ్యూల్‌తో రెండు పాటల చిత్రీకరణ మినహా షూటింగ్‌ పూర్తవుతుందని చెప్పారు. ఆ తర్వాత హైదరాబాద్‌లో ఓ పాటను, విదేశాల్లో మరో పాటను చిత్రీకరించడంతో షూటింగ్‌ ముగుస్తుందని వివరించారు. సెప్టెంబర్‌లో ఆడియోను, దసరాకు సినిమాను విడుదల చేస్తామని అన్నారు. దర్శకుడు మాట్లాడుతూ, కథకు అన్నివిధాలా సరిపోయే టైటిల్‌ ఇది. ఇంతవరకు ఏ చిత్రంలో చూపించని విధంగా యువడితోపాటు యముడి భార్య, కొడుకు వంటి పాత్రలను ఇందులో చూపించబోతున్నామని చెప్పారు. ఈ చిత్రానికి కెమెరా: రవీంద్రబాబు, సంగీతం: కోటి.

...avnk