మెరుగైన చర్మసౌందర్యానికి రెమెడీలు..

Posted: 10/03/2015 04:32 PM IST

మెరుగైన చర్మసౌందర్యాన్ని పొందాలంటే.. సహజ చిట్కాలు పాటిస్తే సరిపోతుంది. తరచూ బ్యూటీ ప్రోడక్టులు ఉపయోగించడం కంటే.. ఇంట్లో వుండే సహజ పదార్థాలతో రెమెడీలు చేసుకుని, రెగ్యులర్ గా చర్మానికి పట్టిస్తే చర్మసౌందర్యాన్ని సొంతం చేసుకోవచ్చు. ప్రస్తుత పోటీ ప్రపంచంలో తీరికలేనంతగా ఉరుకులు బరుగులు తీస్తున్న మహిళలు అందం విషయానికి వచ్చేసరికి హాల్ట్ అయిపోతున్నారు. అలాంటివారిని దృష్టిలో పెట్టుకుని.. నిపుణులు ఈ సౌందర్య చిట్కాలు అందిస్తున్నారు. అవేంటో తెలుసుకుందామా..

* ముఖ తేజెస్సు పెరగాలంటే.. రెండు చెంచాల బాదం నూనెలో చెంచా నిమ్మరసం వేయాలి. దీన్ని ముఖానికి ప్యాక్‌లా వేసి అరగంట తర్వాత గోరువెచ్చని నీళ్లతో కడిగేస్తే సరిపోతుంది. ఈ విధంగా చేయడం ద్వారా నలుపు రంగు పోయి, తెల్లగా నిఘారింపుతో మిళమిళ మెరిసిపోతుంది. అరచెంచా చొప్పున బాదంనూనె, తేనె తీసుకుని మిశ్రమంలా చేసి నిద్రపోయే ముందు నల్లటి వలయాలపై రాస్తే చక్కటి ఫలితం ఉంటుంది. ఆముదం, బాదం నూనె మిశ్రమాన్ని నల్లగా మారిన పెదాలపై తరచూ రాస్తే అవి గులాబీ రంగులోకి మారతాయి.

* కొందరి ముఖంపై, శరీరంపైన నల్లటి వలయాలు ఏర్పడతాయి. అప్పుడు బాదం నూనెలో, కొబ్బరి నూనెను కలిపి.. ఆ మిశ్రమాన్ని నల్లటి వలయాలపై రాస్తే కొద్ది రోజులకు మాయమవుతాయి. ప్రతిరోజూ రాత్రి పడుకునే ముందు బాదం నూనె ముఖానికి రాస్తుంటే చర్మం మెరిసిపోతుంది. పావుగంటపాటు బాదం నూనెని ముఖానికి మర్దన చేశాక గంధంతో ఫేస్‌‌ప్యాక్ వేస్తే ముఖానికి అదనపు సొగసు చేరుతుంది. బాదం నూనె మృతకణాల్ని తొలగించడంలో సాయపడుతుంది. బాదం నూనెలో విటమిన్ ఎ, ఇ ఉంటాయి.

* సమపాళ్లలో బాదం నూనె, తేనె మిశ్రమాన్ని తీసుకుని ముఖానికి రాస్తే మృదువైన చర్మం మీ సొంతమవుతుంది. చెంచా చొప్పున బాదంనూనె, చక్కెర తీసుకుని కలపాలి. దాన్ని వేళ్లతో తీసుకుని ముఖంపై వలయాకారంగా పది నిమిషాల పాటు రుద్దాలి. పది నిమిషాల తర్వాత గోరువెచ్చని నీళ్లతో కడిగేస్తే సరి. దీనివల్ల మృతకణాలు తొలగిపోయి ముఖం శుభ్రంగా మారుతుంది.

* అదేవిధంగా బాదం, ఆముదం నూనె మిశ్రమం జుట్టు పెరగడంలో సాయపడుతుంది. నాలుగు చెంచాల బాదం నూనెలో మూడు చెంచాల ఆముదం వేసి బాగా కలపాలి. దీన్ని జుట్టుకు రాసి శుభ్రమైన వస్త్రంతో చుట్టేయాలి. అర గంటయ్యాక షాంపూతో కడిగేస్తే జుట్టు అందంగా ఉంటుంది.