ఆకాశంలో పండంటి బిడ్డకు జన్మనిచ్చిన తల్లి..

Posted: 12/10/2014 05:04 PM IST

సౌత్ వెస్ట్ ఎయిర్ లైన్స్లో అరుదైన ఘటన చోటుచేసకుంది. ఒక్కసారిగా విమానం మెటర్నిటీ వార్డుగా మారిపోయింది. ఓ ప్రయాణికురాలు ఆకాశంలో తన బిడ్డకు జన్మనిచ్చింది. శాన్ ఫ్రాన్సిస్కో విమానాశ్రయం నుంచి ఫీనిక్స్ వెళ్లాల్సిన ఆ విమానం టేకాఫ్ తీసుకున్న కొద్దిసేపటికే, విమానంలోని ఓ ప్రయాణికురాలికి ప్రసూతి నొప్పులు మొదలయ్యాయి. దీంతో, విమానాన్ని లాస్ ఏంజెల్స్ కు మళ్లించారు. విమానం లాస్ ఎంజెల్స్ చేరుకునే లోపు ప్రయాణికులలో వున్న ఓ డాక్టర్, నర్సు ఇద్దరూ ఆ తల్లికి పురుడు పోసేందుకే వచ్చినట్లు వుండడం గమనార్హం.

డాక్టర్, నర్సు ఆ ప్రయాణికురాలు కాన్పు విషయంలో సాయపడ్డారు. ఎలాంటి సమస్య లేకుండా ఆమె పండంటి మగ శిశువుకు జన్మనిచ్చింది. బిడ్డ ఏడుపు వినిపించగానే ఫ్లైట్ కెప్టెన్ మైక్ లో స్వాగతం పలకగా, ప్రయాణికుంలందరూ తమ హర్షద్వానాలతో సంతోషాన్ని వ్యక్తం చేశారు. లాస్ ఏంజెలిస్ ఎయిర్ పోర్టులో విమానం ల్యాండయ్యాక తల్లీబిడ్డను ఆసుపత్రికి తరలించారు. వారిద్దరూ ఆరోగ్యంగానే ఉన్నారని లాస్ ఏంజెలిస్ అగ్నిమాపక విభాగం ప్రతినిధి ఎరిక్ స్కాట్ తెలిపారు.

జి. మనోహర్