తెలంగాణ అసెంబ్లీలో ఎమ్మెల్యేలకు ర్యాగింగ్ !!

Posted: 11/21/2014 09:27 AM IST

ఇన్నాళ్లు కాలేజీలకు పరిమితం అయిన ర్యాగింగ్ భూతం తాజాగా అసెంబ్లీకి కూడా పాకింది. అది కూడా ఎక్కడో కాదు.. కొత్తగా ఏర్పడిన తెలంగాణ రాష్ర్టంలో, ఎమ్మెల్యేలు ర్యాగింగ్ బారిన పడి ఇబ్బందులు పడుతున్నారట. ఈ విషయాన్ని స్వయంగా పలువురు శాసనసభ్యులు లాబీల్లో మాట్లాడుకుంటున్నారట. అసెంబ్లీలో చర్చ సందర్బంగా పార్టీ తరపున మాట్లాడేందుకు ఎప్పుడో ఒకసారి కొత్త ఎమ్మెల్యేలకు కూడా అవకాశం వస్తుంది. రాక రాక వచ్చిన అవకాశాన్ని వాడుకుని.. తమ అభిప్రాయం సభలో చెప్పాలని లేచి మైకు పట్టుకోగానే వెనక నుంచి కామెంట్లు మొదలవుతాయట.

వెనకాల ఉండే సీనియర్ ఎమ్మెల్యేలు జూనియర్లపై వ్యంగ్యాస్ర్తాలు సంధిస్తారట. ‘‘చెప్పడానికి వచ్చాడు చూడండ్రా కొత్తగా..,’’ అన్నట్లుగా హేళన చేస్తున్నారట. దీంతో అవకాశం వచ్చినా మాట్లాడాలంటే వెనకాల నుంచి ఏ కామెంట్లు వస్తాయో అని యువ ఎమ్మెల్యేలు చాలా ఇబ్బంది పడుతున్నట్లు తెలుస్తోంది. తోటి ప్రజా ప్రతినిధి మాట్లాడుతుంటే ఏం చెప్తున్నారు అని శ్రద్ధగా వినకుండా కాలేజి పిల్లల మాదిరిగా కామెంట్లు చేయటంపై విమర్శలు వస్తున్నాయి. సీనియర్లు అంటే దారి చూపాలి కాని.., ఇలా మనోభావాలను దెబ్బతీయవద్దని పలువురు అంటున్నారు. ఇప్పటికైనా ముఖ్యమంత్రి కేసీఆర్ స్పందించి యువ ఎమ్మెల్యేల ర్యాగింగ్ బాధలపై ప్రకటన చేస్తే బాగుంటుంది.

కార్తిక్