అగ్రరాజ్యాన్ని గజగజలాడిస్తున్న చలిపులి

Posted: 11/19/2014 09:55 PM IST

అగ్రరాజ్యం అమెరికాను చలిపులి గజగజలాడిస్తోంది. ఒకటి కాదు రెండు కాదు ఏకంగా అమెరికాలోని 50 రాష్ట్రాలు అత్యల్ప ఉష్ణోగ్రతలతో వణికిపోతున్నాయి. 38 ఏళ్ల నాటి కనిష్ట ఉష్ణోగ్రతలు నమోదుతో అగ్రరాజ్యవాసులు వణికిపోతున్నారు. పలు రాష్ట్రాల్లో విపరీతమైన చలి, మంచుతో ప్రజలు తీవ్రంగా ఇబ్బంది పడుతున్నారు. హవాయి సహా యునైటెడ్ స్టేట్స్‌లోని అన్ని రాష్ట్రాల్లో దాదాపుగా సున్నా డిగ్రీల సెంటీగ్రేడ్ ఉష్ణోగ్రత నమోదవుతోంది.

1976 తర్వాత నవంబరు నెలలో ఇంతటి అత్యల్ప ఉష్ణోగ్రతలు నమోదవ్వడం ఇదే ప్రథమని అంటున్నారు అమెరికన్లు. న్యూయార్క్‌లో మంచు విపరీతంగా పడుతోందని.. న్యూయార్క్ పశ్చిమ ప్రాంతంలోని ఎరీ కౌంటీలో సుమారు 60 అంగుళాల ఎత్తున మంచు పేరుకుపోయిందని అమెరికన్లు తెలిపారు. న్యూయార్క్ గవర్నర్ ఆండ్రూ క్యూమో 10 కౌంటీలలో అత్యవసర పరిస్థితిని ప్రకటించారు. అత్యల్ప ఉష్ణోగ్రతలు నమోదు కావడంతో పలు రాష్ట్రాల్లో జనజీవనం పూర్తిగా స్థంబించింది. పలు ప్రాంతాల్లో వాహనాల రాకపోకలకు తీవ్ర అంతరాయం కలుగుతోంది. విమానాల రాకపోకల వేళ్లల్లోనూ విమానయాన అధికారులు మార్పలు చేస్తున్నారు.

జి.మనోహర్