12న దేశవ్యాప్తంగా బ్యాంకు ఉద్యోగుల ఒక్క రోజు సమ్మె,

Posted: 11/11/2014 02:44 PM IST

దేశవ్యాప్తంగా బ్యాంక్ ఉద్యోగులు మరోసారి సమ్మెకు దిగబోతున్నారు. వేతనం పెంచాలంటూ యునైటెడ్ ఫోరం ఆఫ్ బ్యాంక్ యూనియన్స్ (యూఎఫ్‌బీయూ) ఆధ్వర్యంలో ఈ నెల 12న ఒక్క రోజు దేశవ్యాప్త సమ్మెను తలపెట్టనున్నారు. గతంలో పెరిగిన మాదిరిగా 11 శాతం కాకుండా 23 శాతం మేర తమ వేతనాలను పెంచాలని డిమాండ్ చేస్తూ బ్యాంక్ ఉద్యోగులు సమ్మె బాట పట్టనున్నారు. తాము ముందుగా చెప్పినట్లు 25శాతం మేర వేతనాలను పెంచాలన్న డిమాండ్ నుంచి కొంత తగ్గామని ఇండియన్ బ్యాంక్ అసోసియేషన్ కూడా తమ డిమాండ్ ను పరిశీలించాని యూనియన్లు అంటున్నాయి.

ఆల్ ఇండియా బ్యాంక్ ఎంపాయిస్ అసోసియేషన్ యూనియన్ ఆధ్వర్యంలో ఐదు ఉద్యోగుల సంఘాలు, 4 ఉన్నతాధికారుల సంఘాలు పనిచేస్తున్నాయి. దేశంలోని ప్రభుత్వ, ప్రైవేట్, విదేశీ బ్యాంకుల ఉద్యోగులందరూ సమ్మె చేయబోతున్నట్లు ఆల్ ఇండియా బ్యాంక్ ఎంప్లాయిస్ యూనియన్ జనరల్ సెక్రటరీ సీహెచ్ వెంకటాచలం తెలిపారు. డిసెంబర్ 2 నుంచి 5 వరకు జోన్ వారీగా మళ్లీ సమ్మె చేయనున్నట్లు ఆయన వెల్లడించారు. 2న దక్షిణ జోన్ ఉద్యోగులు నిరసనకు దిగనున్నట్లు వెంకటాచలం చెప్పారు. ప్రభుత్వం ప్రవేశపెట్టే పథకాలను ప్రోత్సహించడంలో ఎప్పుడూ ముందుండే బ్యాంకు సిబ్బందికి వేతనాలు మాత్రం సరైన స్థాయిలో చెల్లించడం లేదని ఆయన పేర్కొన్నారు.

జి.మనోహర్