కన్నాపై కోపాన్ని అలా ప్రదర్శించాను.. క్షమించండీ...

Posted: 11/04/2014 04:26 PM IST

గుంటూరు జిల్లాలో ఏపీ సాంఘిక సంక్షేమ శాఖా మంత్రి రావెల కిషోర్ బాబు బీజేపిపై చేసిన వ్యాఖ్యలు దుమారం రేపాయి. దీంతో వెంటనే నష్టనివారణ చర్యలు చేపట్టిన ఏపీ సీఎం చంద్రబాబు ఆయన్ను పిలిచి వివరణ కోరారు. బీజేపితో పొత్తు విషయమై తాము పునరాలోచన చేసుకుంటామని రావెల వ్యాఖ్యలు చేశారు. తమ పార్టీ సిద్ధాంతాల విషయంలో రాజీ పడే ప్రసక్తి లేదని, రాష్ట్ర ప్రయోజనాల కోసమే తాము బీజేపీతో పొత్తు పెట్టుకున్నామని కూడా కిశోర్ బాబు అన్నారు. టీడీపీనిను తీవ్రంగా విమర్శించే గుంటూరు జిల్లాకు చెందిన మాజీ మంత్రి కన్నాను ఆ పార్టీలో చేర్చుకోవడంతో తాను ఆ విధంగా మాట్లాడినట్లు రావెల వివరణ ఇచ్చారు.

కన్నా లక్ష్మీనారాయణపై వున్న కోపాన్ని బీజేపీపై తాను ప్రదర్శించానని ఆయన ఇచ్చిన వివరణతో చంద్రబాబు సంతృప్తి చెందలేదు. అయితే ఇదే చివరిసారి క్షఃమించండీ అంటూ రావెల చంద్రబాబును కోరినట్లు సమాచారం.  ఇలాంటి వ్యాఖ్యలు ఇరుపార్టీల మధ్య స్నేహపూర్వక వాతావరణాన్ని దెబ్బతీస్తాయని రావెలను చంద్రబాబు హెచ్చరించారు. ఇటువంటి అంశాల జోలికి వెళ్లకుండా శాఖపైన, నియోజకవర్గ సమస్యలపైన దృష్టిపెట్టాలని ఆయన రావెలకు సూచించారు.

జి.మనోహర్