ప్రధాని మోడీతో.. విప్రో చైర్మన్ అజీమ్ ప్రేంజీ మంతనాలు..

Posted: 10/31/2014 12:49 PM IST

ప్రముఖ వ్యాపారదిగ్గజం, విప్రో చైర్మన్ అజీమ్ ప్రేమ్ జీ ప్రధాన మంత్రి నరేంద్రమోడీతో పలు కీలక అంశాలపై మంతనాలు జరిపారు. నిన్న ప్రధానికి ఫోన్ చేసిన ఆయన వ్యాపార, వాణిజ్య విస్తరణే లక్ష్యంగా పలు కీలక అంశాలపై చర్చించినట్లు సమాచారం. విప్రో చైర్మన్ అజీమ్ ప్రేమ్ జీ ప్రధానికి ఫోన్ చేశారని, పలు అంశాలపై చర్చించారని ప్రధాని కార్యాలయం కూడా దృవీకరించింది. ఈ మేరకు ఒక ప్రకటనను కూడా విడుదల చేసింది. అయితే ఏ ఏ అంశాలపై వారు చర్చించారన్న విషయాలను మాత్రం గోప్యంగా వుంచింది.

కాగా గత కొన్ని రోజులుగా ప్రధాన మంత్రి పలు వ్యాపార దిగ్గజాలు, వాణిజ్యవేత్తలతో చర్చలు జరుపుతున్నారు. భారతదేశాన్ని సుసంపన్న దేశంగా చేయడమే లక్ష్యంగా పెట్టుకున్న ప్రధాని, తన మాససపుత్రికలైన పథకాలు డిజిటల్ ఇండియా, మేక్ ఇన్ ఇండియాలను అమలుపర్చే పనిలో భాగంగానే వారితో చర్చిస్తున్నట్లు సమాచారం. ఇందులో భాగంగానే గత కొన్ని రోజుల క్రితం సాఫ్ట్ బ్యాంక్ చైర్మన్, సీఈఓ మాసయోషి సన్ ప్రధానికి కలసి భారత్ లో పది బిలియన్ అమెరికా డాలర్లను భారత్ లో పెట్టుబడులు పెట్టడానికి అంగీకారం తెలిపారు. అంతకుముందు ఫేస్ బు్ సహ వ్యవస్థాపకుడు, ప్రపంచ యవ్వన బిలియనీర్ అయిన మార్క్ జుకర్ బర్గ్ కూడా డిజిటల్ ఇండియా నిర్మాణానికి సహకరించనున్నట్లు, డిజటలీకరణ విస్తరణకు అంగీకారం తెలిపినట్లు ప్రకటించిన విషయం తెలిసిందే.

జి.మనోహర్