విశాఖలో సాయంత్రానికల్లా సాదారణ పరిస్థితులు..

Posted: 10/14/2014 01:15 PM IST

విశాఖలో ఈ రోజు సాయంత్రానికల్లా సాధారణ పరిస్థితులు నెలకొల్పుతామని అంధ్రప్రదేశ్ ముఖ్యమంత్రి చంద్రబాబు స్పష్టం చేశారు. విశాఖ కలెక్టరేట్ లో ఆయన మీడియాతో మాట్లాడుతూ నిత్యావసరాల కోసం ప్రజలు ఆందోళన పడాల్సిన అవసరం లేదని స్పష్టం చేశారు. పక్క జిల్లాల నుంచి నీటీ ట్యాంకర్లు తెప్పించామని, ఫైర్ ఇంజిన్లతో అపార్టుమెంట్లకు కూడా నీటి సౌకర్యం కల్పిస్తామని చెప్పారు. ఐదు, ఆరు జిల్లాల నుంచి కూరగాయలు తెప్పిస్తున్నామని, తక్కువ ధరలకే కూరగాయలు, ఉల్లిపాయలు కూడా అందిస్తామని తెలిపారు.

హుదూద్ తుపాను సృష్టించిన బీభత్సంతో విశాఖలో పలు సంస్థలు కోల్పోయిన నష్టాన్ని బాబు వెల్లడించారు. ఒక్క నేవీకే రూ.2వేల కోట్ల నష్టం జరిగిందని చెప్పారు. విశాఖ ఉక్కు కర్మాగారానికి రూ.340 కోట్ల ఆస్తినష్టం, విశాఖ విమానాశ్రయానికి రూ.500 కోట్ల నష్టం జరిగిందని తెలిపారు. అటు తుపాను వల్ల షిప్పింగ్ హార్బర్ కు వందకోట్ల నష్టం వాటిల్లిందని అన్నారు. ట్రాన్స్ కో సంస్థకు వేయి కోట్ల నష్టం వాటిల్లిందని చంద్రబాబు వివరించారు. అయితే పూర్తి నివేదికలు అందలేదని అవన్నీ అందిన తరువాత నివేదికను తయారు చేసి కేంద్రానికి పంపుతామని తెలిపారు.

జి.మనోహర్