మరోమారు తగ్గనున్న ఇంధన ధరలు...

Posted: 10/09/2014 07:38 AM IST

అంతర్జాతీయంగా ముడిచమురు ధరలు గణనీయంగా తగ్గడంతో పెట్రోల్, డీజిల్ ధరలు దిగిరానున్నాయి. అంతర్జాతీయ మార్కెట్‌లో ముడిచమురు ధరలు 27 నెలల కనిష్ట స్థాయికి చేరాయి. ఈ నేపథ్యంలో డీజిల్‌పై రూ. 2.50, పెట్రోల్‌పై రూ. 1 తగ్గే అవకాశం ఉంది. అయితే అక్టోబర్ 15న మహారాష్ట్ర, హర్యానాలో అసెంబ్లీ ఎన్నికలు పూర్తయిన తర్వాత ఈ తగ్గింపు అమలులోకి రావచ్చని ప్రభుత్వ వర్గాలు పేర్కొన్నాయి. ప్రతీ నెల రెండు పర్యాయాలు పెట్రోల్ ధరలను సమీక్షించే చమురు సంస్థలు.. ఈ నెల 15న భేటీ కానున్నాయి. ప్రస్తుతం ముడిచమురు ధర అంతర్జాతీయ మార్కెట్‌లో 1.35 డాలర్లు తగ్గి 90.76 డాలర్లకు చేరింది. 2012 జూన్ తర్వాత ధరలు ఈ స్థాయికి దిగి రావడం ఇదే తొలిసారి.

మొత్తంగా ఈ ఏడాదిలో ముడిచమురు ధరలు 18 శాతం తగ్గాయి. సెప్టెంబర్ 16 నాటికే డీజిల్ ధరలు తగ్గడంతో చమురు కంపెనీలకు లీటరుకు 35 పైసలు లాభం వచ్చింది. ఇది అక్టోబర్ 1 నాటికి రూ. 1.90 పైసలకు పెరిగింది. ఇప్పుడు లాభం రూ. 2.50 చేరిందని భావిస్తున్నారు. సెప్టెంబర్‌లోనే డీజిల్ ధర తగ్గించాలని ప్రభుత్వం భావించినా ఎన్నికల కోడ్ అమలులోకి వచ్చినందు వల్ల ఆ నిర్ణయాన్ని వాయిదా వేసింది. కాగా డీజిల్ ధరను ఇటీవల తగ్గించని కారణంగా. ఈ పర్యాయం డీజిల్ ధరను రెండు నుంచి మూడు రూపాయల మేర తగ్గే అవకాశాలున్నాయి

జి. మనోహర్