కడపలో ఐదుగురి కుటుంబ హత్య ‘మిస్టరీ’

Posted: 10/07/2014 12:30 PM IST

కడప పట్టణంలో వెలుగులోకి వచ్చిన ఐదుగురు సభ్యుల కుటుంబం హత్య కలకలం రేపుతోంది. ఏడాది క్రితం అదృశ్యమై ఇవాళ వారంతా శవాలుగా తేలారు. సొంత ఊరిలోనే., సొంతంగా నడుపుతున్న స్కూల్ గ్రౌండ్ లోనే కుటుంబం మృతదేహాలను పాతిపెట్టారు. స్థానికంగా ఈ ఘటన సంచలనం రేపుతోంది. బాధితురాలి కధనం ప్రకారం.., కడపలో కృపాకర్ అనే వ్యక్తికి బాధితురాలి కూతురు మౌనికతో వివాహం జరిగింది. వీరికి ముగ్గరు పిల్లలు. కృపాకర్ స్థానికంగా పాఠశాలను నిర్వహిస్తున్నాడు. ఏడాది క్రితం భార్య, ముగ్గురు పిల్లలతో కలిసి కృపాకర్ కన్పించకుండా పోయాడు.

విషయం తెలిసిన మౌనిక తల్లి పలుమార్లు స్తానిక పోలిసులకు ఫిర్యాదు చేసింది. అయితే వారు కంప్లయింట్ తీసుకున్నా.. కేసు మాత్రం నమోదు చేయకుండా వదిలేశారు. దీంతో ఈ మద్య జిల్లా ఎస్పీని కలిసి తమ కూతురు, అల్లుడు, పిల్లల ఆచూకి కోసం ఏడాదిగా తిరుగుతున్నట్లు ఎస్పీ వద్ద వాపోయింది. దీంతో స్పందించిన ఎస్పీ బాధితురాలి ఫిర్యాదుతో ప్రత్యేక బృందాలను రంగంలోకి దింపారు. కృపాకర్ సన్నిహితులు, ఇతరులను విచారించి వారంతా హత్యకు గురయినట్లు ప్రత్యేక బృందాలు తేల్చాయి. ఈ ప్రకటన ఒక్కసారిగా పట్టణంలో సంచలనం కల్గించింది. అంతేకాకుండా కృపాకర్ నిర్వహిస్తున్న స్కూల్ గ్రౌండ్ లోనే ఐదుగురి మృతదేహాలు ఉన్నట్లు విచారణలో తేలింది. ఈ విషయం తెలిసిన పోలిసులు మృతదేహాల కోసం తవ్వకాలు మొదలు పెట్టారు. ఈ కేసులో ఇద్దరు అనుమానితులను అదుపులోకి తీసుకుని విచారిస్తున్నారు.

కార్తిక్