ఓటర్లు డబ్బులు తీసుకుంటే తప్పేం కాదు... !

Posted: 10/07/2014 09:44 AM IST

కంచే చేను మేసినట్లు కేంద్రమంత్రే ఓటర్లను డబ్బులు తీసుకోండి అని చెప్తుంటే ఇంకా ఎవరు ఆగుతారు. పైగా తాను చేసిన వ్యాఖ్యల పట్ల ఏ మాత్రం బాధపడకుండా.., చెప్పింది కరెక్టే కదా అని నితిన్ గడ్కరీ సమర్దించుకుంటున్నారు. మహారాష్ర్టలో జరుగుతున్న ఎన్నికల ప్రచారంలో ఆదివారం రోజు నితిన్ గడ్కరీ పాల్గొన్నారు. లాతూరు లో జరిగిన సభలో ప్రసంగిస్తూ.., ఎన్నికల సమయంలో నేతలు ఇచ్చే డబ్బులను తీసుకోవాలన్నారు. దీనికి సంబంధించి చిన్న వివరణ కూడా ఇచ్చారు. అయితే ఎన్నికల కోడ్ నిబంధనలు ఉల్లంఘిస్తూ వ్యాఖ్యలు చేయటంతో గడ్కరీకి ఈసీ షోకాజు నోటిసులు జారీ చేసింది.

వ్యాఖ్యలను ఎందుకు చేశారో వివరణ ఇవ్వాలని నోటిసులో ఆదేశించింది. ఈ నోటిసుపై స్పందించిన గడ్కరీ తాను చేసిన వ్యాఖ్యల్లో తప్పేమి లేదన్నారు. ఓటర్లను డబ్బులు తీసుకోమని చెప్పిన మాటకు ఇప్పటికి కట్టుబడి ఉన్నట్లు చెప్తున్నారు. ఓవైపు ప్రధాని నరేంద్రమోడి అవినీతి రహిత భారత్; సుపరిపాలన అని కార్యక్రమాలు చేపడతుంటే మరోవైపు తన కేబినెట్ లోని కీలక కేంద్రమంత్రులే ఇలా మాట్లాడటం ఎంతవరకు సమంజసం అని విమర్శలు వస్తున్నాయి. ప్రలోభాలకు లొంగకుండా ఓటేయాలని చెప్పాల్సిన మంత్రి స్వయంగా డబ్బులు తీసుకోవాలి అని చెప్పటం విడ్డూరంగా ఉంది అంటున్నారంతా.

కార్తిక్