తమిళనాడు ప్రజలే నా ఆస్తి, వారికే నా ఆస్తి..

Posted: 10/02/2014 01:49 PM IST

తమిళనాడు ప్రజలే నా ఆస్తి, నా ఆస్తి అంతా వారికే’.. స్వతహాగా సొంత కుటుంబమే లేని నాకు కోట్లాది రూపాయల అక్రమార్జన అవసరమేమిటని అమె న్యాయమూర్తిని ప్రశ్నించిందట. ఎవరామె, ఏమా కథా అనుకుంటున్నారా..? ామె మరెవరో కాదు తమిళనాడు మాజీ ముఖ్యమంత్రి, అన్నాడీఎంకే అధినేత్రి జయలలిత. బెంగళూరు కోర్టులో తీర్పు వెలువడిన వెంటనే న్యాయమూర్తి సమక్షంలో జయలలిత ఈ వ్యాఖ్యలు చేసినట్లు ఓ ప్రముఖ తమిళ పత్రికలో కథనం ప్రచురితమైంది.

జయ తొలిసారిగా ముఖ్యమంత్రి హోదాను పొందిన చివరి రోజుల్లో (1991-96) ఐదు కోట్ల రూపాయల వ్యయంతో తన పెంపుడు కొడుకు సుధాకరన్ వివాహాన్ని జరిపించింది. దీంతో పాటు భారీగా అక్రమార్జన చేసినట్లు జనతా పార్టీ అధ్యక్షుడు సుబ్రహ్మణ్య స్వామి ఆ తరువాత అధికారంలోకి వచ్చిన డీఎంకే ప్రభుత్వానికి ఫిర్యాదు చేశారు. ఈ ఫిటిషన్‌పై ఏసీబీ అధికారులు విచారణ జరిపి రూ.66.44 కోట్లు అక్రమార్జనగా లెక్కతేల్చి కోర్టులో చార్జిషీటు దాఖలు చేశారు. 18 ఏళ్లపాటు సాగిన ఈ కేసుపై గత నెల 27వ తేదీన తీర్పు వెలువడింది.

సీఎం హోదాను అడ్డం పెట్టుకుని ఆదాయానికి మించిన ఆస్తులను కూడబెట్టినట్లు రుజువైందని న్యాయస్థానం తీర్పును వెలువరించింది. అక్రమాస్తుల కేసులో జయలలితకు నాలుగేళ్ల జైలు శిక్ష, అరేళ్ల పాటు ప్రజా ప్రతినిధుల చట్టం మేరకు అనర్హత వేటు విధించింది. ఈ నాలుగు రోజుల్లో జయను జైల్లో కొందరు ముఖ్యులు కలుసుకున్నారు. వీరి ద్వారా సేకరించిన సమాచారాన్ని కథనంగా ఓ తమిళ దినపత్రిక ప్రచురించింది. తాను స్వతహాగా ఆస్తిపరురాలిని, సినీ నటిగా కూడా ఎంతో సంపాదించాను. రాజకీయాల్లోకి రాక ముందు నుంచే తనకు మంచి ఆస్తి ఉందని కోర్టులో న్యాయమూర్తికి వివరించిందిట. తనకంటూ ఓ కుటుంబమే లేనప్పుడు అక్రమంగా ఆర్జించాల్సిన అవసరం ఏముందని న్యాయమూర్తినే ప్రశ్నించిందట. తనకున్న ఆస్తి అంతా తమిళనాడు ప్రజలేనని,. అందుకే తన ఆస్తినంతా తమిళనాడు ప్రజలకే అంకితం చేస్తానని చెప్పిందట. ప్రజాకోర్టులో తనన్ను ఢీకొనలేని కొందరు వ్యక్తులు కుట్రపన్ని తనను న్యాయస్థానానికి రప్పించారని, అక్రమ కేసులను బనాయించి ప్రతీకారం తీర్చుకుంటున్నారంటూ తీర్పువెలువడిన అనంతరం న్యాయమూర్తికి జయ విన్నవించుకున్నట్లు తమిళ పత్రిక కథనంలో పేర్కొంది.
 
జి.మనోహర్