వారి నుండి మమ్మల్ని కాపాడండీ.. ప్లీజ్..

Posted: 09/28/2014 07:19 PM IST

అధికార పార్టీ కార్యకర్తల నుంచి తమ కార్యకర్తలకు ప్రాణ రక్షణ కల్పించాలని తమిళనాడు ప్రతిపక్ష నాయకుడు, డీఎండీకే అధ్యక్షుడు ఎ.విజయకాంత్ కోరారు. తమ అధినేత్రి జయలలిత జైలు పాలు కావడంతో ఆ పార్టీ కార్యకర్తలు ఆందోళనలు తీవ్ర రూపం దాల్చాయని ఆయన అన్నారు. అన్నాడీఎంకే కార్యకర్తల నుంచి తమ పార్టీ నేతలకు ప్రమాదం పోంచి వుందని అనుమానం వ్యక్తం చేశారు. ఈ మేరకు గవర్నర్ కె. రోశయ్యను కలిసి విజ్ఞప్తి చేశారు. అన్నాడీఎంకే కార్యకర్తల నుంచి తమతో పాటు అన్ని రాజకీయ పార్టీల నాయకులకు రక్షణ కల్పించాలని గవర్నర్ ను కోరినట్టు భేటీ అనంతరం విజయకాంత్ తెలిపారు.

తమ పార్టీ అధినేత్రి జయలలితకు కోర్టు జైలు శిక్ష విధించడంతో అన్నాడీఎంకే కార్యకర్తలు రాష్ట్రవ్యాప్తంగా దౌర్జన్యకాండకు దిగారు. పుదుకొట్టయ్, తిరుచ్చిలోని డీఎండీకే కార్యాలయాలపై అన్నాడీఎంకే మద్దతుదారులు దాడి చేశారు. రెండు ప్రభుత్వ బస్సులను తగులబెట్టారు. ఈ నేపథ్యంలో తమ పార్టీ కార్యకర్తలు, నేతలకు కూడా ప్రమాదం సంభవించవచ్చునని, అందుకని తమతో పాటు అన్ని పార్టీల నేతలకు, కార్యకర్తలకు రక్షణ కల్పించాలని విజయకాంత్ గవర్నర్ ను కలసి కోరారు.

జి మనోహర్