పొన్నాలను తెలంగాణ ప్రజలు విశ్వసించలేదు..

Posted: 09/21/2014 11:54 AM IST

సార్వత్రిక ఎన్నికలు జరిగి నాలుగు మాసాలు కావస్తున్నా.. తెలంగాణ పీసీసీ అధ్యక్షుడు పొన్నాల లక్ష్మయ్యపై సొంతగూటికి చెందిన నేతలే కస్సుమంటున్నారు. ఆయన అసమర్థపు నాయకత్వం వల్లే పార్లమెంట్, అసెంబ్లీ ఎన్నికల్లో కాంగ్రెస్ ఘోర పరాజయం పొందిందంటున్నారు. ఎన్నో త్యాగాలకు ఓర్చి తెలంగాణ తెచ్చిన, ఇచ్చిన కాంగ్రెస్ ను ప్రజలు విశ్వసించకపోడానికి కారణం పోన్నాలేనని ని కేంద్ర మాజీ మంత్రి పోరిక బలరాంనాయక్ ఆరోపించారు. పొన్నాల లక్ష్మయ్య పీసీసీ అధ్యక్షుడిగా నియమించిన నాటి నుంచే రాష్ట్రంలో కాంగ్రెస్ పార్టీకి నష్టం జరగడం ప్రారంభమైందన్నారు. పొన్నాల వల్లే కాంగ్రెస్ ఓటమి పాలైందన్న విషయాన్ని తాను ఎక్కడైనా ధైర్యంగా చెబుతానన్నారు. పొన్నాల మినహా ఎవరు ఆ పదవిలో ఉన్నా... ఫలితాలు ఆశాజనకంగా ఉండేవన్నారు. ఉమ్మడి రాష్ట్రంలో సమైక్య ముఖ్యమంత్రుల అడుగులకు మగుడులోత్తిన పోన్నాలను ప్రజలు విశ్వసించలేదని.. అందకనే కాంగ్రెస్ కు ఓటు వేయలేదని విమర్శించారు.

టీఆర్‌ఎస్ ఎమ్మెల్యేలు, మంత్రులు ఉన్న నియోజకవర్గాల్లో ఇప్పటివరకు ఎలాంటి అభివృద్ధి పనులు జరగనప్పుడు... రెడ్యానాయక్ ప్రాతినిథ్యం వహిస్తున్న డోర్నకల్‌లో అభివృద్ది ఎలా జరుగుతుందన్నారు. రేట్లు పెంచే ఫైళ్ల మీద మాత్రమే ముఖ్యమంత్రి కేసీఆర్ సంతకాలు చేస్తున్నారని విమర్శించారు. సీఎం పనులతో ఆయన కుటుంబానికే లబ్ధి జరుగుతోందన్నారు. కాంగ్రెస్ పార్టీ అధికారంలోకి వచ్చి ఉంటే డోర్నకల్ ఎమ్మెల్యే రెడ్యానాయక్‌కు ముఖ్యమంత్రి గానీ... ఉప ముఖ్యమంత్రి గానీ అయ్యే అవకాశముండేదన్నారు. సీనియర్ ఎమ్మెల్యేగా రెడ్యాకు డోర్నకల్‌ను అన్ని రంగాల్లో అభివృద్ధి చేసే సత్తా ఉందన్నారు. ఎమ్మెల్యే రెడ్యానాయక్, ఎంపీపీ మేకపోతుల రమ్య, జెడ్పీటీసీ సభ్యురాలు కేశబోయిన స్వరూప పాల్గొన్నారు.

జి మనోహర్