సమగ్ర సమాచారం అంతా కంప్యూటర్లలో నిక్షిప్తం..

Posted: 09/19/2014 07:34 AM IST

తెలంగాణలో నివసించే ప్రతీ ఒక్కరి జాతకాలు కంప్యూటర్లలో నిక్షిప్తమైవున్నాయి. తెలంగాణలోని కేసీఆర్ ప్రభుత్వం ప్రతిష్ఠాత్మకంగా నిర్వహించిన సమగ్ర కుటుంబ సర్వే సమాచారానికి సంబంధించి అధికారులు కంప్యూటరీకరణ ప్రక్రియ పూర్తి చేశారు. తెలంగాణ రాష్ట్రంలో 1.05 కోట్ల కుటుంబాలు, 3.61 కోట్ల జనాభా ఉన్నట్లు అధికారులు నిర్ధారణ అయింది. గత నెల 19న ఒక్క రోజులోనే చేపట్టి పూర్తిచేసిన ఈ సర్వేలో వివిధ అంశాలకు సంబంధించిన సమాచారాన్ని ప్రభుత్వం సేకరించింది. కోటికిపైగా కుటుంబాల సర్వే సమాచారాన్ని రికార్డు స్థాయిలో నెలరోజుల్లోనే అధికారులు కంప్యూటరీకరణ చేయగలిగారు. మొత్తం తెలంగాణ రాష్ట్రంలో సమగ్ర కుటుంబ సర్వే వివరాలను సమాచారాన్ని అధికారులు క్రోడీకరించారు.

సర్వేలో సేకరించిన తాజా సమాచారంతో సంక్షేమ పథకాలను అర్హులకే దక్కేలా కార్యాచరణ రూపొందించనున్నారు. సర్వే సమాచారంతో ప్రభుత్వ పథకాల రూపకల్పన, అమలు జరగనుంది. పింఛన్లు, ఇళ్లు, వంటి వ్యక్తిగత ప్రయోజనాల కల్పనకు సర్వే సమాచారం కీలకం కానుంది. సుమారు 22 అంశాలతో సమాచారాన్ని విశ్లేషించి అవసరమైన శాఖలు వినియోగించుకునేలా చేస్తారు. మరోవంక ఈ సర్వే వివరాలను కొన్ని గ్రామాల్లో సరిచూడనున్నారు. సంబంధిత శాఖలకు ఈ సర్వే సమాచారం ప్రాథమికంగా ఉపయోగపడుతుంది. అవి సంక్షేమ పథకాలను అమలు చేసేటపుడు లబ్ధిదారులకు సంబంధించి అవసరమైన సమాచారాన్ని ప్రత్యేకంగా సేకరించుకుంటాయి.

సర్వేతో తెలంగాణలో జిల్లాలవారీగా కూడా ప్రభుత్వం సమాచారం క్రోడీకరించింది. కుటుంబాల సంఖ్య, జనాభా పరంగా హైదరాబాద్ ముందుంది. జీహెచ్ఎంసీ పరిధిలో జనాభా 73.07 లక్షలు కాగా,  మహబూబ్‌నగర్ జిల్లాలో కుటుంబాల సంఖ్య తక్కువ, జనాభాలో ఇతర అన్ని జిల్లాలకంటే ముందుంది. ఈ జిల్లాలో 42.14 లక్షల జనాభా ఉన్నట్లు వెల్లడైంది.  హైదరాబాద్ తర్వాత అత్యధికంగా కరీంనగర్ లో 12.35 లక్షల కుటుంబాలు ఉన్నాయి. నల్గొండ జిల్లాలో కుటుంబాల సంఖ్య వరంగల్ జిల్లా కంటే ఎక్కువగా ఉన్నా.. జనాభా మాత్రం వరంగల్ కంటే తక్కువగా ఉంది. అన్నింటా నిజామాబాద్ జిల్లా కుటుంబాల సంఖ్యలో, జనాభాలో కూడా తెలంగాణ రాష్ట్రంలో చివరి స్థానంలో ఉంది.

జి.మనోహర్