త్వరలో హైదరాబాద్ లో 4జీ సేవలు

Posted: 09/17/2014 08:04 AM IST

ఆఫీసులకు వెళ్లి పనిచేయాలంటే బోర్ కొడుతోందా..? నిత్యం నాలుగు గోడలు, ఏసీలు, సూదీ పడినా వినిప్పించేంత నిశబ్దంతో విసిగిపోయారా..? ఇక ఇప్పడా బాధలు తొలగిపోనున్నాయి. ఆఫీసు నాలుగు గోడల మధ్య కాకుండా.. ఎంచక్కా ఆరు బయట కూడా కూర్చొని ఆఫీసు పనులు చేసుకునే సౌలభ్యం హైదరాబాద్ వాసులకు త్వరలోనే అందుబాటులోకి రానుంది.  ప్రకృతి అందాలను తిలకిస్తూ... పక్షుల కిలకిలారావాలు వింటూ విధులు నిర్వహించే అవకాశం హైదరాబాద్ వాసులకు రానుంది. ముఖ్యంగా ఐటీ ఉద్యోగులు బోర్ కొట్టకుండా ఉండేందుకు ఇలాంటి వాతావరణాన్ని కోరుకునేవారు ఇక మరెంతో కాలం వేచి చూడాల్సిన అవసరం లేదు. ఎందుకంటారా..? త్వరలోనే హైదరాబాద్ వాసులకు 4జీ వైఫై సేవలు అందుబాటులోకి రాబోతున్నాయి.
 
మాదాపూర్‌లో త్వరలో 4జీ వైఫై సేవలు అందుబాటులోకి తీసుకువచ్చేందుకు రాష్ట్ర ప్రభుత్వం సన్నాహాలు చేస్తోంది. ఐటీ కారిడార్‌లో వైఫై సేవలందించేందుకు యుద్ధ ప్రాతిపదికన పనులు చేపడుతున్నారు. ఐటీ ఉద్యోగులతో పాటు విద్యార్థులు, వ్యాపారులు, సాధారణ ప్రజలూ వైఫై సేవలు వినియోగించుకునేందుకు వీలుంటుంది. మాదాపూర్ శిల్పారామంలో వైఫై పనులు చురుగ్గా సాగుతున్నాయి. రిలయన్స్ సంస్థ 4జీ వైఫై అండర్ గ్రౌండ్ కేబుల్ పనులు దాదాపు పూర్తి చేసింది. శిల్పారామంలో ప్రతి 250 మీటర్ల దూరానికి ఆరేసి వైఫై పాయింట్లను ఏర్పాటు చేశారు.
 
ప్రధాన ద్వారం లాన్ వద్ద, ఆంపీ థియేటర్, నైట్‌బజార్, రూరల్ మ్యూజియం, కోనసీమ, రద్దీగా ఉండే ప్రాంతాలలో పాయింట్లు ఏర్పాటు చేశారు. త్వరలో 4జీ సేవలను సందర్శకులకు అందించనున్నట్లు నిర్వాహకులు తెలిపారు. ఆంపీ థియేటర్ వద్ద గ్రౌండ్ బాస్ మాస్ట్ (జీబీఎం)ను ఏర్పాటు చేశారు. ఈ జీబీఎం 500 మీటర్ల రేడియేషన్‌ను కవర్ చేస్తుంది. దాదాపుగా శిల్పారామంలోని అన్ని ప్రాంతాలకు వైఫై అందుబాటులో ఉంటుంది. దీంతో పాటు
సైబర్ పెరల్, హైటెక్స్ ఎగ్జిబిషన్ గ్రౌండ్, హెచ్‌ఐసీసీ వద్ద కూడా వైఫై పాయింట్లను ఏర్పాటు చేస్తున్నట్లు నిర్వాహకులు తెలిపారు. దీంతో మాదాపూర్‌లోని ఐటీ కారిడార్‌లో వైఫై సేవలు త్వరలోనే అందుబాటులోకి రానుంది.

జి.మనోహర్