కేసీఆర్ ను వెన్నాడుతున్న హాట్ కామెంట్స్

Posted: 09/13/2014 02:44 PM IST

తెలంగాణ ముఖ్యమంత్రి కె. చంద్రశేఖర్ రావును ఆయన హాట్ కామెంట్స్ వెన్నాడుతున్నాయి. మీడియాపై వివాదాస్పద వ్యాఖ్యలు చేయడంతో ఆయనపై చర్యలకు ప్రెస్ కౌన్సిల్ ఆఫ్ ఇండియా ఉపక్రమించింది. నిజానికి సీఎం కేసీఆర్ వివాదాస్పద వ్యాఖ్యలు చేశారా..? లేదా..? అన్న విషయాన్ని విచారించేందుకు ప్రెస్ కౌన్సిల్ ఆఫ్ ఇండియా చైర్మన్ మార్కండేయ కట్జూ త్రిసభ్య కమిటీని ఏర్పాటు చేశారు. వరంగల్ బహిరంగ సభలో కేసీఆర్ చేసిన వ్యాఖ్యాలను, సందర్భాలను క్షుణ్ణంగా పరిశీలించాలని ఆయన త్రిసభ్య కమిటీని ఆదేశించారు.

సీనియర్ జర్నలిస్టు రాజీవ్ రంజన్‌నాగ్ ఈ కమిటీకి కన్వీనర్‌గా వ్యవహరిస్తుండగా, కె. అమర్‌నాథ్, కృష్ణప్రసాద్ లను కట్జూ సభ్యులుగా నియమించారు.
తెలంగాణలో మీడియా ఎదుర్కొంటున్న ముప్పు, బెదిరింపుల విషయంలో తీసుకోవాల్సిన చర్యలను ఈ కమిటీ సిఫారసు చేయాల్సిందిగా కట్జూ కమిటీని అధేశించారు. తెలంగాణను కించపరిస్తే మీడియా మెడలు విరుస్తానని, పాతరేస్తానని కేసీఆర్ అన్నట్లు వచ్చిన ఆరోపణలపై కమిటీ విచారణ జరపనుంది.

జి.మనోహర్