జర్నలిస్టులు, ఉద్యోగులకు ఏపీ శుభవార్త

Posted: 09/12/2014 12:06 PM IST

జర్నలిస్టులకు ఏపీ ప్రభుత్వం శుభవార్త తెలిపింది. చాలా కాలంగా పెండింగ్ లో ఉన్న హెల్త్ కార్డుల విషయం త్వరలోనే పరిష్కారం అవుతుందని మంత్రి కామినేని శ్రీనివాస్ తెలిపారు. మరో రెండు లేదా మూడు వారాల్లో జర్నలిస్టులతో పాటు ప్రభుత్వ ఉద్యోగులకు కూడా హెల్త్ కార్డులు జారి చేస్తామన్నారు. కార్డుల జారీపై ఇప్పటికే ప్రభుత్వం పలు దపాలుగా చర్చలు జరిపిందని మంత్రి చెప్పారు. అదే విధంగా ప్రతి మండల కేంద్రంలో జనరిక్ మెడికల్ షాపును ఏర్పాటు చేస్తామని చెప్పారు. వీటి ద్వారా తక్కువ ధరకే మందులను అందించగలమన్నారు. పేద రోగులను దృష్టిలో ఉంచుకుని ఈ కార్యక్రమం చేపడుతున్నామన్నారు.

ఇక వర్షాకాలం కావటంతో అంటువ్యాధులు ప్రబలకుండా ప్రభుత్వ పరంగా జాగ్రత్తలు తీసుకుంటున్నట్లు వివరించారు. శుక్రవారం ఉదయం తిరుమల శ్రీవారిని మంత్రి దర్శించుకున్నారు. స్వామి దర్శనం తర్వాత మీడియాతో మాట్లాడిన మంత్రి.. చిత్తూరు జిల్లాలో రెండు డెంగ్యూ జ్వరం కేసులు నమోదయినట్లు తెలిపారు. అటు రాష్ర్టంలో ప్రభుత్వ హాస్పిటల్లలో మందుల కొరత ఉన్న మాట వాస్తవమే అని అంగీకరించారు. త్వరలోనే కొరతను తీరుస్తామన్నారు. వరద ప్రాంతాల్లో సహాయక చర్యలను వేగవంతం చేయటంతో పాటు.., రోగాలు వ్యాపించకుండా జాగ్రత్తలు తీసుకుంటున్నామని కామినేని వెల్లడించారు.

కార్తిక్