ఎంసెట్ రెండోదశ కౌన్సిలింగ్ లేదన్న సుప్రీం

Posted: 09/11/2014 01:37 PM IST

Supreme courts rejects ap s eamcet second phase counselling plea

సుప్రీంకోర్టులో ఏపీ ఉన్నత విద్యామండలికి భంగపాటు ఎదురయింది. రెండవ విడత కౌన్సిలింగ్ నిర్వహించేందుకు అనుమతి ఇవ్వాలన్న మండలి పిటిషన్ ను న్యాయస్థానం కొట్టేసింది. పిటిషన్ పై విచారణ సందర్బంగా తొలి విడతలో 65వేలకు పైగా సీట్లు మిగిలిపోయినందున సెకండ్ ఫేజ్ కు అనుమతివ్వాలని మండలి కోరింది. అయితే ఈ విజ్ఞప్తిని కోర్టు తోసిపుచ్చింది. తొలివిడత కౌన్సిలింగ్ ఆలస్యంగా నిర్వహించిన ఉన్నత విద్యామండలికి మరోసారి అవకాశం ఇచ్చే ప్రసక్తే లేదని జ్టసిస్ ముఖోపాధ్యాయ తెలిపారు.

తొలి విడత కౌన్సిలింగ్ గడువు పొడగింపుపై తమకు ముందుగా సమాచారం ఇవ్వలేదని కోర్టు ఆగ్రహం వ్యక్తం చేసింది. గతంలో ఇచ్చిన షెడ్యూల్ నే కొనసాగించాలని స్పష్టం చేసింది. అంటే ఇక ఈ ఏడాదికి ఏపీలో ఖాళీ సీట్ల భర్తీకి అవకాశం లేనట్లే. తొలి విడతగా కౌన్సిలింగ్ కు ఏపీ ఉన్నత విద్యామండలి సిద్ధమవగా తెలంగాణ ప్రభుత్వం మొదట్లో సహకరించలేదు. తమ కౌన్సిలింగ్ సొంతంగా నిర్వహించుకుంటామని చెప్పింది. దీనిపై కొద్ది వివాదం తర్వాత రెండు రాష్ర్టాలు కలసి కౌన్సిలింగ్ నిర్వహించాయి. ఫలితంగా కౌన్సిలింగ్ ప్రక్రియ ఆలస్యమైంది. అయితే ఈ ఆలస్యంపై సుప్రీంకోర్టుకు ఉన్నత విద్యామండలి సమాచారం ఇవ్వలేదు.

65వేలకు పైగా సీట్లు ఖాళీగా ఉండటంతో కాలేజీల యాజమాన్యాలు ఆందోళన చెందుతున్నాయి. రెండవ విడతలో కాస్తయినా సీట్ల భర్తీ జరుగుతుందని ఆశించిన వారు సుప్రీం తీర్పుతో నిరాశ చెందుతున్నారు. సగం సీట్లు భర్తీ అయి.., కొన్నిచోట్ల అసలే సీట్లు భర్తీకాకుండా కాలేజీలు నడపలేమని మేనేజ్ మెంట్ చెప్తోంది. కోర్టు తీర్పుపై రివ్యూ పిటిషన్ వేస్తే.., లేక కాలేజి యాజమాన్యాలు, ప్రభుత్వం మరొక పిటిషన్ వేస్తే వచ్చే తీర్పుపై తదుపరి నిర్ణయం అమలవుతుంది.

కార్తిక్