తెలంగాణ ఎం.ఎస్.ఓ.లపై కేంద్రం చర్యలు

Posted: 09/11/2014 10:28 AM IST

Central government will take action on telangana msos

తెలంగాణలో ఏబీఎన్, టీవీ9 నిషేదం వివాదం ముదిరి పాకాన పడింది. చానెళ్లను ప్రసారం చేసేదే లేదని బీష్మించి కూర్చున్న ఎం.ఎస్.ఓ.లకు కేంద్రం షాకిచ్చింది. త్వరలోనే తెలంగాణలో ఛానెళ్లు నిషేదించిన కేబుల్ ఆపరేటర్లపై చర్యలు తీసుకుంటామని కేంద్ర సమాచార శాఖ మంత్రి ప్రకాష్ జవదేకర్ తెలిపారు. మీడియాను రెండు నెలలకు పైగా నిషేధంలో పెట్టడంపై తీవ్ర ఆగ్రహం వ్యక్తం చేశారు. ఇదేం పాలన, ఇదెక్కడి ప్రభుత్వ విధానమని ఆశ్చర్యం వ్యక్తం చేశారు. తమ చానెళ్ళ ప్రసారాల నిలిపివేతపై రెండు చానెళ్ళ జర్నలిస్టులు ప్రకాష్ జవదేకర్ ను కలిశారు.

ప్రసారాల కోసం రెండు నెలలుగా తాము చేస్తున్న ధర్నాలు, నిరసనలు, విజ్ఞప్తులను వివరించారు. చానెళ్ళపై తెలంగాణ ప్రభుత్వ వైఖరి విన్న కేంద్ర మంత్రి ఆశ్చర్యం వ్యక్తం చేశారు. ప్రభుత్వమంటే ఇలాగేనా వ్యవహరించేదని అసహనం వ్యక్తం చేశారు. త్వరలోనే చానెళ్ళను పునరుద్ధరించేలా చర్యలు తీసుకుంటామని హామి ఇచ్చారు. అదేవిధంగా నిషేదాన్ని అమలు చేసిన తెలంగాణ ఎం.ఎస్.ఓ.లపై కూడా చర్యలు తీసుకుంటామని చెప్పారు.

ఛానెళ్ళ నిషేదంపై ఢిల్లీ పర్యటనలో తనను కలిసిన ముఖ్యమంత్రి కేసీఆర్ ను జవదేకర్ ఆరా తీశారు. అయితే తామెలాంటి ఆంక్షలు పెట్టలేదనీ.., ఎం.ఎస్.ఓ. వ్యవహారంతో తమకు సంబంధం లేదన్నారు. దీంతో వారిపైనే చర్యలు తీసుకుంటామన్నారు. కేంద్రమంత్రి తాజా హెచ్చరికతో అయినా ఆపరేటర్లు దిగి వస్తారా.., లేక మొండిపట్టుతో మొదటికే మోసం వచ్చేలా వ్యవహరిస్తారా అనేది వేచి చూడాలి. అటు జర్నలిస్టులు, మీడియాపై కేసీఆర్ వ్యాఖ్యల పై జాతీయ మీడియా కూడా దృష్టిపెట్టింది. తొక్కేస్తామన్న కేసీఆర్ వ్యాఖ్యలను ప్రధాన అంశాలుగా జాతీయ మీడియా ఛానెళ్లు ప్రసారం చేసి, చర్చలు నిర్వహిస్తున్నాయి.

కార్తిక్