టీఆర్ఎస్ ఎమ్మెల్యేలకు శరాఘాతం

Posted: 09/03/2014 06:33 PM IST

మెదక్ లోక్సభ స్థానానికి జరిగనున్న ఎన్నికలు ప్రత్యక్ష యుద్దాన్ని తలపించేలా వున్నాయి. అధికార టీఆర్ఎస్ నుంచి బరిలో నిలిచిన కొత్త ప్రభాకర్ రెడ్డిని ఎలాగైనా గెలిపించాలని పార్టీ నేతలు తీవ్రంగా కృషి చేస్తున్నారు. మెదక్ పార్లమెంట్ సెగ్మంట్లోని రమారమి అన్నిఅసెంబ్లీ సెగ్మంట్లలో ఇటీవల జరిగిన ఎన్నికలలో టీఆర్ఎస్ విజయబావుటా ఎగురవేసింది. అదే ఇప్పడు టీఆర్ఎస్ పార్టీ ఎమ్మెల్యేలకు శాపంగా పరిణమించింది. ఇటీవల మెదక్ లోక్సభ పరిధిలోని ప్రజాప్రతినిధులతో పార్టీ అధినేత, సీఎం కేసీఆఱ్ భేటీ అయ్యి మెదక్ ఉప ఎన్నికలో తనకు వచ్చిన మెజారిటీ కంటే ఇంకా ఎక్కువ రావాలని ఆదేశించారు.

    సీఎం కేసీఆర్ ఆదేశాలు ఎమ్మెల్యేలకు కొత్త కష్టాలను తెచ్చిపెట్టాయి. గత ఎన్నికల్లో తెలంగాణ తీసుకువచ్చిన పార్టీగా టీఆర్ఎస్ ఓటు వేసిన ప్రజలు.. ఇప్పడిప్పుడే కొత్త ఆలోచనలు చేస్తున్నారు. అనేక నిరసనలు, ఆందోళనలు మధ్య తెలంగాణ ఇచ్చిన కాంగ్రెస్.. దేశవ్యాప్తంగా ఓటమిని చవిచూడడం తెలంగాణ ప్రజలను విస్మయం చెందేలా చేసింది. అంతే కాకుండా.. ఇటీవల జరిగిన ఆరు రాష్ట్రాలలోని అసెంబ్లీ స్థానాలకు జరిగిన ఉప ఎన్నికలలో కాంగ్రెస్ కాస్త మెరుగైన ఫలితాలను సాధించింది. ఇదే ఇప్పడు టీఆర్ఎస్ నేతలను జడిపిస్తోంది. ఇక్కడ కూడా కాంగ్రెస్ తన ప్రభావాన్ని తిరిగి చాటుకుంటుందేమోనని నేతలు తలపట్టుకుంటున్నారు. ఇదే జరిగితే మంత్రివర్గ విస్తరణలో అమాత్యుల స్థానాలను ఆశిస్తున్న నేతలు ఆశలు వదులుకోవాల్సి వస్తుందని ఆందోళన  చెందుతున్నారు.         

    ఇక మరోవైపు మేము లేకుంటే తెలంగాణ బిల్లు పార్లమెంటులో ఎలా పాసయ్యేదంటూ బీజేపి నేతలు ప్రశ్నల వర్షం కురిపిస్తున్నారు. మైనారిటీలో వున్న యూపీఏ ప్రభుత్వానికి తాము మద్దతు ఇవ్వబట్టే తెలంగాణ బిల్లు పాస్ అయ్యిందని వాదిస్తున్నారు. అంతేకాకుండా టీఆర్ఎస్ గూటి నుంచి ఎగిరిపోయిన జగ్గారెడ్డినే అభ్యర్థిగా నిలపడంతో కేసీఆర్పై విమర్శల వర్షం కురిపించి.. ఆయన కూడా టీఆర్ఎస్ ఓట్లకు గండి కొట్టే అవకాశం వుందని విశ్లేషకులు భావిస్తున్నారు.