అనుమానమే ఆ ఇద్దరి ప్రాణం తీసింది

Posted: 09/02/2014 10:25 AM IST

అనుమానం పెనుభూతమైంది. ఇద్దరి ప్రాణాలు తీసింది. భార్యపై అనుమానం పెంచుకున్న భర్త ఒక్కసారిగా యముడిగా మారిపోయాడు. కట్టుకున్న భార్యతో పాటు సొంత కూతురిని కడతేర్చాడు. కడప జిల్లా జమ్మలమడుగు మండలంలోని పెదదండ్లూరులో ఈ విషాదం జరిగింది. స్థానికంగా ఉండే ఓ కుటుంబంలో భార్యపై భర్తకు తీవ్ర అనుమానం ఉండేది. ఆమె ప్రవర్తన పట్ల ఎప్పుడూ అనుమానం వ్యక్తం చేసేవాడు. ఈ క్రమంలోనే అనుమానం అతనిలో పెనుభూతంగా మారింది.

భార్యపై అనుమానం పెంచుకుని ఎలాగైనా ఆమెను హతమార్చాలనుకున్నాడు. గొడ్డలితో భార్యను దారుణంగా నరికి చంపాడు. ఆ తర్వాత ఇద్దరు పిల్లలను కూడా కిరాతకంగా గొడ్డలితో నరికాడు. ఈ దాడిలో భార్య, ఒక కూతురు మృతి చెందారు. అబ్బాయి తీవ్ర గాయాలపాలు కాగా చికిత్స కోసం స్థానికులు కర్నూలు ఆస్పత్రికి తరలించారు.

దాడికి పాల్పడ్డ నిందితుడు వెంటనే పరారయ్యాడు. విషయం తెలుసుకున్న పోలిసులు ఘటనా స్థలానికి చేరుకుని ఆధారాలు సేకరించారు. కేసు నమోదు చేసుకున్నట్లు తెలిపారు. అనుమానం వల్లే భర్త దాడి చేసినట్లు పోలిసులు ప్రాధమికంగా నిర్ధారణకు వచ్చారు. ప్రస్తుతం నిందితుడి కోసం గాలిస్తున్నామని.., అతడిని పట్టుకుంటే మరిన్ని వివరాలు తెలుస్తాయని చెప్తున్నారు.

 

కార్తిక్