రేప్ కేసులో కేంద్రమంత్రి కొడుకు.. డేంజర్ లో మోడీ ప్రభుత్వం!

Posted: 08/28/2014 03:29 PM IST

Central minister sadananda gowda son karthik booked in rape case

బీజేపీ పార్టీలో కొనసాగుతున్న సీనియర్ నాయకులపై ఈమధ్య ఆరోపణలు తీవ్రస్థాయిలో వెలువడుతున్నాయి. పార్టీ అధికారంలోకి వచ్చి ఇంకా మూడునెలలైనా పూర్తి కాలేదు కానీ... అప్పుడే వారిమీద అక్రమాలు, దోపిడీలు, అన్యాయాలు, అవినీతి, అత్యాచారాలు వంటి నేరాలు చేసినట్టు విమర్శలు వస్తున్నాయి. నిన్నటికినిన్నే కేంద్రహోంమంత్రి రాజ్ నాథ్ సింగ్ కుమారుడు అవినీతికి పాల్పడుతున్నాడంటూ.. ఆయన కుటుంబం అవినీతితో కూరుకుపోయిందంటూ ఆరోపణలు వచ్చిన విషయం తెలిసిందే! ఇప్పుడు తాజాగా మరో కేంద్రమంత్రి సదానందగౌడ కుటుంబంపై అదే స్థాయిలో తీవ్రమైన ఆరోపణలు వస్తున్నాయి. దీంతో ఇప్పుడు ఆ పార్టీ పెద్ద డైలమాలో మునిగిపోయింది.

కేంద్ర రైల్వే మంత్రి సదానందగౌడ కుమారుడు కార్తీక్ ఒక అమ్మాయిని అత్యాచారం చేశాడంటూ కేసు నమోదైంది. బుధవారం కార్తీక్ వివాహ నిశ్చితార్థం జరగగా.. ఒక నటి అతనిపై ఆర్టీ నగర్ పోలీస్ స్టేషన్లో కేసు పెట్టిందని సిటీ పోలీస్ కమిషనర్ ఎంఎస్ రెడ్డి తెలిపారు. తనను పెళ్లి చేసుకుంటానని మోసం చేశాడని, తనను అత్యాచారం చేసి వదిలేశాడని ఆ నటి నేరారోపణలు చేసినట్టు ఆయన పేర్కొన్నారు. ఈ విధంగా ఫిర్యాదు చేసిన సదరు నటి కూడా ఒక టెలివిజన్ ఛానెల్ ఇంటర్య్యూలో మాట్లాడుతూ.. కార్తీక్ తనను ఎప్పుడో పెళ్లి చేసుకున్నాడని.. ఇప్పుడు మళ్లీ పెళ్లి చేసుకుంటాడని ప్రశ్నించింది. దీంతో ఈ విషయం తారాస్థాయికి చేరిపోయింది. ఇక ప్రత్యర్థ నాయకులు అయితే ఇదే మంచి అవకాశమనుకుని బీజేపీ పార్టీపై విమర్శలు చేయడం ప్రారంభించేశారు.

అయితే తమపై వస్తున్న ఈ అత్యాచార ఆరోపణలను సదానందగౌడ ఖండించారు. తన కుమారుడు అటువంటి అశ్లీల పనులు చేయడని.. ఒకవేళ నాకొడుకు ఆ తప్పు చేసినట్లు రుజువైతే శిక్షించమని పేర్కొన్నారు. అలాగే తనపై నమోదైన ఆరోపణలను కార్తీక్ ఖండించాడు. తన తండ్రి పరువు దిగజారిపోయే పనులు తాను ఎన్నటికీ చేయనని.. ఆమె చేస్తున్నవన్నీ అసత్య ఆరోపణలని తెలిపాడు. ఏదిఏమైనా.. మోడీ ప్రభుత్వంలో వున్న నాయకుల మీద ఒక్కొక్కటిగా ఇలా ఆరోపణలు రావడంతో అందరూ అనుమానాలు వ్యక్తం చేస్తున్నారు. ఒకవేళ ఈ కేసు నిజమేనని తేలితే మాత్రం.. మోడీ ప్రభుత్వం డేంజర్ లో పడిపోవడం ఖాయం!