కేసీఆర్‌తోనే ప్రజాసంక్షేమం సాధ్యం : బాబు

Posted: 08/26/2014 07:28 AM IST

(Image source from: chandrababu naidu ready to do work with telangana cm kcr for people)

ఎప్పుడూ ఒకర్నొకరు తిట్టుకుంటూ నిత్యం కొత్త వివాదాలకు తెరలేపే తెలంగాణ - ఆంధ్రరాష్ట్రాల ముఖ్యమంత్రులు కేసీఆర్ - చంద్రబాబు.. ఇన్నాళ్ల తర్వాత ఒక్కటయ్యారు. మొన్నటికిమొన్నే గవర్నర్ సమక్షంలో మొట్టమొదటిసారిగా అధికారికంగా కలుసుకున్న ఈ ఇద్దరూ సీఎంలు.. తమ రాష్ట్రాల్లో వుండే సమస్యల గురించి పరిష్కరించుకోవడమే కాకుండా సమావేశం అయిపోయిన అనంతరం ఒకరి గురించి ఒకరు బాగానే పొగిడేసుకున్నారు. ముఖ్యంగా తెలంగాణ సీఎం కేసీఆర్ అన్ని విషయాల్లోనూ తనకు సముఖత చూపినట్లు చంద్రబాబు స్పష్టం చేశారు.

తాజాగా ఆయన ఢిల్లీలో నరేంద్రమోడీని కలుసుకున్న అనంతరం మీడియా సమావేశంలో మాట్లాడిన ఆయన.. అక్కడ కూడా కేసీఆర్ గురించి కొన్ని మంచి మాటలను వ్యక్తం చేశారు. ఈ నేపథ్యంలో బాబు మాట్లాడుతూ.. కేసీఆర్‌తోనే ప్రజాసంక్షేమం సాధ్యం అవుతుందనే ధోరణిలో అభిప్రాయాన్ని వ్యక్తం చేశారు. ఒకర్నొకరు నిందించుకుంటూ, గొడవలు పడుతుంటే ప్రజలకు ఇబ్బంది కలుగుతుందని.. ఆ నేపథ్యంలో తామిద్దరూ కలిసి పనిచేస్తే ప్రజలకు కావాల్సిన సంక్షేమ పథకాలు అమలు చేయడంలో ఎటువంటి ఇబ్బందులు వుండవని పేర్కొన్నారు. ఇవన్నీ సవ్యంగా జరగాలంటే కేసీఆర్ కలిసి పనిచేయడానికి ఒప్పుకోవాలని.. అప్పుడే ఇది సాధ్యపడుతుందని ఆయన వెల్లడించారు.

ఇందులో భాగంగానే బాబు.. ‘‘రెండు రాష్ట్రాల ముఖ్యమంత్రులు నిత్యం గొడవలు పడుతూ వుంటే ప్రజలు తీవ్రంగా నష్టపోయే ప్రమాదం వుంది. రెండు రాష్ట్రాల మధ్య సఖ్యత వుంటేనే దీనిని పరిష్కరించుకోవచ్చు. ఇందుకు కేసీఆర్ కూడా సముఖత వ్యక్తం చేశారు. పరస్పరం గొడవ పడుతూనే వుంటే సమస్యలు పరిష్కారం ఎప్పటికీ కాలేవు. అందుకే ప్రజాసంక్షేమం కోసి కేసీఆర్‌తో కలిసి పనిచేయాలని నిర్ణయించుకున్నాం’’ అని ఆయన స్పష్టం చేశారు. ఇక చివరగా.. విభజన జరిగిన ఇంతకాలమైన ఐఏఎస్, ఐపీఎస్‌ల పంపిణీ ఇంకా పూర్తికాలేదని ఆయన మండిపడ్డారు.