భవిష్యత్తు వెతుకులాటలో టీ.కాంగ్రెస్

Posted: 08/24/2014 09:24 AM IST

 

తెలంగాణ కాంగ్రెస్ భవిష్యత్తు వెతుకులాటలో పడింది. మేలో ఎన్నికల దెబ్బకు సొమ్మసిల్లి పడిపోయిన హస్తం నేతలు.., ప్రజలు అభయహస్తం ఇవ్వకపోవటంతో కోలుకోలేకపోతున్నారు. అటు కేంద్రంలో ఇటు తెలుగు రాష్ర్టాల్లో చతికిలబడ్డ కాంగ్రెస్ గళం విన్పించేందుకు కూడా ఆలోచించాల్సి వస్తోంది. తమ భవిష్యత్తు ఏమిటని నేతలు మేధోమధనం చేస్తున్నారు. భవిష్యత్తు కార్యాచరణపై చర్చించేందుకు సమావేశం అవుతున్నారు. ఆది, సోమవారాల్లో రెండ్రోజుల పాటు టి.కాంగ్రెస్ సమావేశాలు నిర్వహిస్తోంది. రంగారెడ్డి జిల్లా ఇబ్రహీంపట్నం దగ్గర్లోని శ్రీ ఇందు కాలేజీలో ఈ సమావేశం జరుగుతోంది. రెండ్రోజుల సమావేశం కోసం దాదాపు పది అంశాలను గుర్తించారు. వాటిపై సమావేశంలో చర్చించేందుకు ప్రత్యేక బృందాలను కూడా ఏర్పాటు చేశారు.

ఎన్నికల్లో ఘోర ఓటమిని చవిచూసిన కాంగ్రెస్ పార్టీ.., ఇప్పుడిప్పుడే తిరిగి పుంజుకునే ప్రయత్నంలో ఉంది. దేశ వ్యాప్తంగా కాంగ్రెస్ వ్యతిరేక పవనాలు వీయగా.., ఏపీలో అయితే కనీసం ఒక్క  సీటు కూడా గెలుచుకోకుండా రికార్డు నెలకొల్పుకుంది. ఇక ప్రజలు కోరుకున్న ప్రత్యేక రాష్ర్టం ఇచ్చిన తెలంగాణలో కూడా ఆదరణకు నోచుకోలేక ప్రతిపక్షంలో కూర్చుంది. ఈ రెండ్రోజుల పాటు జరిగే తెలంగాణ కాంగ్రెస్ సమావేశాల్లో ప్రదానంగా ప్రభుత్వ విధానాలకు వ్యతిరేకంగా పోరాడటంతో పాటు.., పార్టీ బలపేతం కోసం తీసుకోవాల్సిన చర్యలపై చర్చ జరగనుంది. ఫీజు రి ఎంబర్స్ మెంట్, సంక్షేమ పధకాల అమలులో జరుగుతున్న జాప్యం వంటి ప్రజా సమస్యలపై పోరాడటంతో పాటు.., పార్టీ బలోపేతం కోసం క్షేత్రస్థాయిలో పర్యటించటం.., కార్యకర్తల నమోదు వంటి అంశాలపై చర్చ జరిపి నిర్ణయాలు తీసుకోనున్నారు. రెండ్రోజుల్లో వీరు భవిష్యత్తును ఎలా నిర్ణయించుకుంటారో చూడాలి.

 

కార్తిక్