న్యూడ్ డాన్స్ లు వద్దు

Posted: 08/12/2014 04:23 PM IST

హైదరాబాద్ లో ప్లేబాయ్ క్లబ్బు ప్రారంభంపై దుమారమే రేగుతోంది. దేశ సంస్కృతిని చెడగొడుతున్నారంటూ ఇప్పటికే బారతీయ జనతా పార్టీ ఆందోళనలు చేస్తోంది. క్లబ్ ప్రారంభోత్సవం రోజు గొడవ కూడా చేసింది. దేశంలో ఎక్కడా క్లబ్ అనుమతివ్వలేదని.., తెలంగాణ ప్రభుత్వం ఎలా అనుమతి ఇస్తుందని వారు ప్రశ్నిస్తున్నారు. క్లబ్చులో న్యూడ్ డ్యాన్స్, అమ్మాయిలు మందు అందించటం వల్ల కల్చర్ దెబ్బతినటమే కాకుండా భవిష్యత్ యువత జీవితాలు నాశనం అవుతాయని ఆవేదన వ్యక్తం చేస్తున్నారు. ఈ వివాదం తీవ్రం అవుతుండటంతో సైబరాబాద్ పోలిస్ కమిషనర్ సీవీ ఆనంద్ స్పందించారు. ప్లేబాయ్ క్లబ్ అనుమతి ఇప్పటిది కాదని చెప్పారాయన.

అందరూ అంటున్నట్లు ప్లేబాయ్ క్లబ్ కు అనుమతి ఇచ్చింది తెలంగాణ ప్రభుత్వం కాదని ఆనంద్ చెప్పారు. క్లబ్ కు ఉమ్మడి రాష్ర్టంలోనే అనుమతి లభించిందన్నారు. అనుమతితో తెలంగాణ ప్రభుత్వానికి సంబంధం లేదని స్పష్టం చేశారు. క్లబ్ ఎప్పుడు అనుమతి తీసుకున్నా ఆలస్యంగా ప్రారంబించారని చెప్పారు. ఇక అనుమతి విషయంలోనూ నిబంధనలు విధించామన్నారు. న్యూడ్ డ్యాన్స్ అంగీకరించమని అనుమతి సమయంలో స్పష్టంగా చెప్పామన్నారు. సెమి న్యూడ్ డ్యాన్స్ కూడా ఒప్పుకునే ప్రసక్తే లేదన్నారు. వీటికి తోడు విదేశాల్లో ఉన్నట్లు ఆడవారిచే మద్యం సరఫరా చేయిస్తే చూస్తూ ఊరుకోమని ముందే హెచ్చరించామన్నారు. క్లబ్ లో మహిళా ఉద్యోగి ఎవరూ ఉండరాదన్నారు. ఇలా మొత్తం 21 నిబంధనలతో ప్లేబాయ్ క్లబ్ కు అనుమతి ఇచ్చామని ఆనంద్ చెప్పారు.  ఈ నిబంధనలు పాటిస్తేనే క్లబ్ కొనసాగుతుందని లేకపోతే చట్ట ప్రకారం చర్యలు తప్పవని సీవీ ఆనంద్ హెచ్చరించారు. క్లబ్ కు గత ప్రభుత్వం అనుమతిచ్చింది సరే.., సమాజంపై చెడు ప్రభావం చూపే ఇటువంటి వాటిపై ఈ ప్రభుత్వమైనా చర్యలు తీసుకోవాలి కదా. ఎందుకలా చేయటం లేదనేదే ఇప్పుడు ప్రశ్నగా మిగిలింది. ప్లేబాయ్ లో ప్రభుత్వ పెద్దలు ఎవరికైనా ప్రత్యక్ష, పరోక్ష భాగస్వామ్య ముందా లేక ప్రపంచస్థాయి సంస్థ హైదరాబాద్ కు వచ్చిందని చెప్పుకోవటం కోసం మౌనంగా ఉన్నారా?

కార్తిక్