‘‘బారతరత్న’’తో నేతాజీని అవమానపరుస్తున్నారా..?

Posted: 08/11/2014 01:06 PM IST

స్వాతంత్ర్య సమరయోధుడైన సుభాష్ చంద్రబోస్ (నేతాజీ)తోపాటు దివంగత మదన్ మోహన్ మాలవ్యా, మాజీ ప్రధాని వాజ్ పేయి, కాన్షీరాం, భారత హాకీ మాజీ కెప్టెన్ దివంగత ధ్యాన్ చంద్ తదితరులకు అత్యున్నత పౌర పురస్కారం అయిన ‘‘భారతరత్న’’ అవార్డు ఇచ్చేందుకు కేంద్రప్రభుత్వం సన్నాహాలు చేస్తోందని వార్తలు వస్తున్నాయి. అయితే ఈ వార్తల నేపథ్యంలో నేతాజీకి సదరు అవార్డు ఇచ్చి ఆయనను అవమానపరుస్తున్నారని నేతాజీ సోదరుడి తమ్ముడు, తృణమూల్ కాంగ్రెస్ ఎంపీ సుగతోబోస్, చంద్రకుమార్‌ బోస్‌ లు వ్యాఖ్యానిస్తున్నారు. ఈ అవార్డును తాము స్వీకరించబోమని నేతాజీ కుటుంబసభ్యులు తీవ్రంగా స్పందిస్తున్నారు. ఈ అవార్డు ఇస్తే ఆయనతోపాటు, తమ కుటుంబాన్ని కూడా అవమానపరిచినట్లేనని వారు మండిపడుతున్నారు.

ఈ అంశం మీద నేతాజీ కుటుంబసభ్యులు మాట్లాడుతూ.. ‘‘నేతాజీకి భారతరత్న ఇవ్వాల్సిన అవసరం లేదు. ఆయన అదృశ్యం వెనుక వున్న మిస్టరీని ఛేదించి, ఆ వివరాలను మా కుటుంబసభ్యులతోపాటు యావత్తు దేశానికి విశదీకరించండి’’ అంటూ వారు డిమాండ్ చేస్తున్నారు. 1945వ సంవత్సరం నుంచి నేతాజీ ఆచూకీ ఇంతవరకు తెలియరాలేదు. ఆయన ఎప్పుడు, ఎక్కడ కన్నుమూశారో.. దానికి తగిన ఆధారాలేమిటో ప్రభుత్వం స్పష్టంగా వివరించాలని వారు కోరుతున్నారు. ఈ భారతరత్న పురస్కారాన్ని ఆయనకు అందజేయాలంటే.. ముందుగా ఆయన మరణించిన వివరాలను పూర్తిగా చెప్పాలంటూ నేతాజీ కుటుంబీకులు పట్టుబడిమరీ కోరుతున్నారు. ఇలా కానిపక్షంలో నేతాజీకి భారత్నరత్న ఇచ్చి అవమానపరిచినట్లేనని వారు పేర్కొంటున్నారు.

ఈ నేపథ్యంలోనే వారు మాట్లాడుతూ.. నేతాజీ లాంటి స్వాతంత్ర్య సమరయోధుడికి రాజీవ్ గాంధీ కంటే ముందే ఎందుకు ప్రకటించలేదని వారు ఆవేదన వ్యక్తం చేశారు. నేతాజీ స్థాయి రాజీవ్ కంటే చాలా ఎక్కువని.. అయినా ఆయనకి ముందుగా ఈ అవార్డు ఇవ్వకుండా ఘోరంగా అవమానపరిచారని వారు మండిపడుతున్నారు. ఇదిలావుండగా.. నేతాజీగారు అదృశ్యమైన వివరాలను ప్రభుత్వం బహిర్గతం చేయనిదే తాము ఈ అవార్డును ఎట్టి పరిస్థితుల్లోనూ స్వీకరించబోమని వారు ఖరాఖండీగా స్పష్టం చేశారు. అయితే భారత ప్రభుత్వం ఈ అవార్డులను ప్రకటిస్తున్నట్టు ఇంకా అధికారిక ప్రకటన వెలువడాల్సి వుంది.

AS