టాలీవుడ్ లో ఫిక్సింగ్ హీరో!

Posted: 08/09/2014 06:56 PM IST

(Image source from: former indian cricketer sreesanth interested in tollywood movies)

ఆమధ్య ఐపీఎల్ క్రికెట్ మ్యాచుల్లో సందర్భంగా స్పాట్ ఫిక్సింగ్ కి పాల్పడ్డాడంటూ ఆరోపణలు ఎదుర్కున్న శ్రీశాంత్.. క్రికెట్ నుంచి జీవితకాల నిషేధానికి గురయ్యాడు. కొన్నాళ్లపాటు జైళ్లో వుండి బెయిల్ మీద బయటకొచ్చిన వెంటనే పెళ్లి చేసుకుని అందరికీ ఆశ్చర్యానికి గురిచేశాడు. క్రికెట్ నుంచి బహిష్కరించబడిన అనంతరం తిరిగి రావడానికి ప్రయత్నాలు సాగిస్తాడన్న అందరి అభిప్రాయానికి తిరిగి కొట్టాడు. ఇక ‘‘ఝలక్ దిఖ్ లాజా’’ డ్యాన్సింగ్ షోలో పాల్గొని అందరికీ కోలుకోలేని ఝలక్ ఇచ్చాడు ఈ ఫిక్సింగ్ వీరుడు.

ఇప్పుడు తాజాగా సినిమాల్లోనే ఫిక్సింగ్ చేసినట్లు వార్తలు జోరందుకుంటున్నాయి. అయితే ఇక్కడ ఫిక్సింగ్ అంటే క్రికెట్ లో లాగా బ్రోకర్ పనులు చేయడం కాదులెండి... సినిమాల్లో హీరోగా నటించాలనుందని తన మనసులో వున్న కోరికను బయటపెట్టాడు. ఈ నేపథ్యంలోనే తెలుగులో ఓ సినిమా చేసేందుకు సిద్ధంగా వున్నానని ప్రకటించాడు. దీనికి సంబంధించి అన్ని ఏర్పాట్లను సిద్ధం చేసుకున్నట్లు తెలిపాడు. ఈ విషయం మీద తెలుగు దర్శకునితో చర్చలు జరుపుతున్నట్టు వెల్లడించాడు. త్వరలోనే తన సినిమాకు సంబంధించి అధికారికంగా ప్రకటన విడుదల చేస్తానని అతను స్పష్టం చేశాడు.

తన వ్యక్తిగత కార్యకలాపాలకోసం శుక్రవారంనాడు హైదరాబాద్ కు వచ్చిన శ్రీశాంత్.. మాధాపూర్ లోని నొవాటెల్ హోటల్ లో మీడియా సమావేశంలో పాల్గొని.. తాను టాలీవుడ్ లో కూడా ఫిక్సింగ్ చేస్తున్నట్టు ప్రకటించాడు. ఇదిలావుండగా... అంతర్జాతీయ స్థాయిలో వున్నప్పుడే స్పాట్ ఫిక్సింగ్ కు పాల్పడిన ఈ కుర్రోడు.. ఇప్పుడు సినిమాల్లో ఇంకెన్ని దుమారాలు రేపుతాడోనని అందరూ చర్చించుకుంటున్నారు.