జశ్వంత్ కాలుజారి కోమాలోకి

Posted: 08/09/2014 08:02 AM IST

ఢిల్లీలోని తన ఇంట్లో కాలుజారిపడిన జశ్వంత్ సింగ్ తలకు తీవ్రమైన గాయంకావడంతో ఆయన్ను ఆసుపత్రికి తరలించారు. జశ్వంత్‌ను ఢిల్లీలోని ఆర్మీ రిసెర్చ్, రిఫరల్ హాస్పిటల్‌లో చేర్చారు. తలకు తీవ్రగాయాలైన ఆయన కోమాలో ఉన్నారని వైద్యులు చెప్తున్నారు. ప్రస్తుతం జశ్వంత్ పరిస్థితి తీవ్ర ఆందోళనకరంగా ఉంది. లైఫ్ సపోర్ట్ సిస్టం ఆధారంగా వైద్యులు చికిత్స అందిస్తున్నారు.

న్యూరోసర్జన్లు ఎప్పటికప్పుడు ఆయన ఆరోగ్యపరిస్థితిని పర్యవేక్షిస్తున్నారు అని రక్షణమంత్రిత్వశాఖ ఒక ప్రకటనలో తెలిపింది. తలకు తీవ్రగాయాలతో అత్యంత విషమపరిస్థితిలో, కోమాలోకి వెళ్లిన జశ్వంత్‌ను ఆయన కుటుంబసభ్యులు హాస్పిటల్‌లో చేర్చారు.

జశ్వంత్ సింగ్ జారిపడటంతో మెదడులో రక్తంగడ్డకట్టినట్టు వైద్యపరీక్షల్లో తేలింది. జశ్వంత్ ఆరోగ్యపరిస్థితిపై ప్రధానమంత్రి నరేంద్రమోడీ ఆయన కుటుంబసభ్యులను అడిగి తెలుసుకున్నారు. వేగంగా కోలుకోవాలన్న ఆకాంక్షను మోడీ వ్యక్తంచేసినట్టు ప్రధానమంత్రి కార్యాలయం తెలిపింది.

బీజేపీ అగ్రనేతలు అద్వానీ, రాజ్‌నాథ్‌సింగ్ ఆస్పత్రికి వెళ్లి జశ్వంత్‌సింగ్‌ను పరామర్శించారు. భారత విదేశీ వ్యవహారాల మంత్రి, ఆర్థికమంత్రిగా పనిచేసిన జశ్వంత్‌సింగ్ బీజేపీ టికెట్ ఇవ్వకపోవడంతో గత లోక్‌సభ ఎన్నికల్లో స్వతంత్ర అభ్యర్థిగా పోటీచేసి ఓడిపోయారు. సమాచారం తెలుసుకున్న ప్రధాని నరేంద్ర మోడీ జశ్వంత్ కుటుంబ సభ్యులతో ఫోన్‌లో మాట్లాడి పరిస్థితిని తెలుసుకున్నారు.

RS