తెలుగువారు ‘‘తెలుగు’’ భాషలో మాట్లాడితే శిక్షిస్తున్నారు!

Posted: 08/05/2014 12:16 PM IST

High court judge justice k narasimha reddy controversial comments telugu language

అవును..! మన ఉమ్మడి తెలుగు రాష్ట్రాల్లో వుంటున్న ప్రజలు తెలుగు మాట్లాడితే శిక్షిస్తున్నారట! ఒకవేళ తెలుగు సరిగ్గా మాట్లాడకపోతే.. వారికి గొప్పోళ్లుగా భావించి.. దండలు వేసిమరీ గౌరవిస్తున్నారట! ఈ మాటలు అన్నది ఎవరో కాదు... సాక్షాత్తూ హైకోర్టు న్యాయమూర్తి జస్టిస్ ఎల్. నరసింహారెడ్డి పేర్కొన్నారు. ప్రస్తుతం ఆంధ్రప్రదేశ్, తెలంగాణ రాష్ట్రాల్లో పరిస్థితులను బేరీజు రవేసుకుని చూస్తే... రాష్ట్రేతరులే (ఇతర రాష్ట్రంవారు) తెలుగును చాలా బాగా పోషించుకుంటున్నారని ఆయన స్పష్టం చేశారు.

‘‘ఇక్కడ (ఆంధ్ర, తెలంగాణ రాష్ట్రాల్లో) తెలుగులో మాట్లాడితే శిక్షిస్తున్నారు.. తెలుగు రాదంటే ఉన్నత శ్రేణికి చెందినవారుగా భావిస్తున్న పరిస్థితులు కనిపిస్తున్నాయి’’ అంటూ ఆయన ఆవేదన వ్యక్తం చేశారు. శ్రీరాములు తెలుగు విశ్వవిద్యాలయం, మండలి వెంకటకృష్ణారావు అంతర్జాతీయ తెలుగు కేంద్రం ఆధ్వర్యంలో మండలి కృష్ణారావు సంస్కృతీ పురస్కార దినోత్సవం ఎన్టీఆర్ కళామందిరంలో సోమవారం రాత్రి జరిగింది. బర్మా తెలుగు సంఘం (మయన్మార్) అందజేసిన 2013 సంస్కృతి పురస్కారాన్ని ఆ సంఘం తరఫున ఎర్రనాయుడు.. ప్రపంచ తెలుగు సమాఖ్య (చెన్నై)కు అందజేసిన 2014 సంస్కృతి పురస్కారాన్ని ఆ సంఘానికి ప్రతినిధి అయిన ఆదిశేషయ్యలు అందుకున్నారు. పురస్కారం కింద ఒక్కో సంఘానికి రూ.25 వేల నగదును అందుకున్నారు.

ఈ కార్యక్రమంలోనే పాల్గొన్న హైకోర్టు న్యాయమూర్తి ఎల్.నరసింహారెడ్డి మాట్లాడుతూ... ఇతర రాష్ట్రాలు, దేశాల్లో స్థిరపడినవారంతా ఎన్నో కష్టాలు పడి తమ భాషను పరిరక్షించుకోవడానికి నడుం బిగిస్తుంటే... మన తెలుగువారు మాత్రం అందులో వెనుకబడి వుండటం గమనించాల్సిన విషయమని అన్నారు. అలాగే తెలంగాణ రాష్ట్ర ప్రభుత్వ సలహాదారు కె.వి.రమణాచారి ప్రసంగిస్తూ.. ఇరు ప్రభుత్వాలను ఒప్పించి తెలుగు భాష పరిరక్షణకు కృషి చేస్తామని ఆయన పేర్కొన్నారు. ఈ కార్యక్రమంలో ఇంకా చాలామంది ప్రముఖులు కూడా పాల్గొన్నారు.