అందరి బంధువయ్యా.. మా మోడీ రావయ్యా!

Posted: 08/04/2014 05:31 PM IST

Varanasi widows preparing 1000 rakhis pm narendra mod

భారతదేశ ప్రధానమంత్రి నరేంద్రమోడీ మీద ప్రస్తుతం ‘‘అందరి బంధువయ్యా’’ అంటూ రాగాలు తీస్తున్నారు. ముఖ్యంగా ఆయన సొంత నియోజకవర్గంలోని భర్తలు లేకుండా వితంతువులగా జీవితాన్ని గడుపుతున్న మహిళలు మోడీని అన్నయ్యగా అభివర్ణిస్తున్నారు. ఇంతవరకు ఏ రాజకీయ నాయకునికి దక్కని గౌరవం కేవలం మోడీకే సాధ్యపడుతోంది. ఎందుకంటే.. వారణాసిలో వున్న వితంతువులు ప్రత్యేకంగా మోడీ కోసం రాఖీ పండుగ నేపథ్యంలో 1000 రాఖీలు సమర్పిస్తున్నట్టు తాజా వార్తలు వెల్లడయ్యాయి.

ఎన్జీవో సులభ్ ఇంటర్నేషనల్ వారు విడుదల చేసిన ప్రకటన ప్రకారం.. 1980కి చెందిన వందలాది వితంతువులు మోడీ కోసం ప్రత్యేకంగా చాలా రాఖీలను తయారుచేస్తున్నారని తెలిపింది. వీరందరి జీవితాల్లో తోడుగా ఏ మగవారు లేరు... పైగా వీళ్లంతా పేదవారు. తమకోసం ఎవరో ఒకరు వస్తారని.. తమ కడుపులు నింపుతారనే నమ్మకంతో ఇన్నాళ్లు కాలం గడిపారని... ఇఫ్పుడు మోడీ రాగానే వాళ్లు ఎంతో సంతోషంతో వున్నారని సదరు సంస్థ పేర్కొంది. ఆ సంస్థలో దాదాపు 1500 మంది దాకా వితంతువులు వున్నారు. మోడీ వారణాసి నియోజకవర్గంలో పోటీ చేసి గెలిచిన శుభసందర్భంలో రాఖీపండుగ నేపథ్యంలో ఆయనకోసం 1000 రాఖీలను వీరు తయారుచేస్తున్నారు. వీరితోపాటు నేపాల్ కు చెందిన కొన్ని మహిళా సంఘాలు కూడా మోడీ కోసం రాఖీలు పంపిస్తున్నట్టు వార్తలు వస్తున్నాయి.