అసెంబ్లీలో అపరిచితుడు

Posted: 07/30/2014 01:30 PM IST

హైద్రాబాద్ లో మూడంచల సెక్యూరిటీతో కట్టుదిట్టమైన భద్రతగల అసెంబ్లీలోకి మంగళవారం రాత్రి ఒక మతిస్తిమితం లేని వ్యక్తి ప్రవేశించటాన్ని ఎవరూ కనిపెట్టలేకపోవటం సంచలనాన్ని సృష్టిస్తోంది. 

సిసి కెమేరాలు ఆ వ్యక్తి కదలికలను స్పష్టంగా రికార్డ్ చేసాయి.  బయట గేటు ఎక్కి అసెంబ్లీ ప్రాంగణంలోకి ప్రవేశించిన ఆ మతి స్థిమితం లేని వ్యక్తిని సెక్యూరిటీ గార్డ్ లెవరూ గమనించకపోవటం, సిసి కేమెరాలలో కనిపిస్తున్నా ఎవరూ దాన్ని మోనిటర్ చెయ్యకపోవటం సర్వత్రా విమర్శలకు దారితీస్తోంది.  

ఆ వ్యక్తిని ఎవరూ అడ్డుకోకపోవటంతో అతను ఎమ్మెల్యేలు ప్రవేశించే ద్వారాన్ని బద్దలు కొట్టే ప్రయత్నం చెయ్యటం, ఆ పనిలో 80 శాతం విజయం సాధించటం కూడా జరిగింది కానీ సెక్యూరిటీవాళ్ళకి కనపడలేదు, వినపడలేదు.  అతనా పనులు చెయ్యటం, అద్దాల తలుపులను పగలగొట్టిన కుర్చీని వేసుకుని ఒక గంటసేపు దర్జాగా కూర్చోవటం కూడా సిసి కేమెరాలు రికార్డ్ చేసాయి.  

ఉదయం 8, 8.30 మధ్యలో కనిపెట్టిన సెక్యూరిటీ గార్డ్ లు ఆ మతి స్థిమితం లేకుండా ఉన్న వ్యక్తిని పోలీసులకు అప్పగించారు.

ఈ ఘటనతో సెక్యూరిటీ విషయంలో పలు ప్రశ్నలు ఉదయిస్తున్నాయి.

-శ్రీజ