‘‘గూగుల్’’ని భారత్ లో బ్యాన్ చేస్తారా..?

Posted: 07/28/2014 10:07 AM IST

ప్రస్తుతం ఇంటర్నెట్ సెర్చ్ ఇంజన్లు ఎన్నో వున్నప్పటికీ వాటిన్నింటినీ తలదన్ని నేడు ప్రపంచంలోనే నెంబర్ వన్ స్థానానికి చేరుకుంది ‘‘గూగుల్’’! బహుశా ఈ సెర్చ్ ఇంజన్ లేకపోతే చాలాపనులు పెండింగ్ లో పడిపోయుండేవి. ఇది యువతరానికి కావల్సిన అన్ని సౌకర్యాలను కల్పించడంతోపాటు ప్రభుత్వ రంగానికి కూడా ఎంతో తోడ్పడుతోంది. అయితే కొన్ని విషయాల్లో మాత్రం ఈ సెర్చ్ ఇంజన్ రూల్స్ ని అతిక్రమించి ప్రవర్తిస్తోందని అప్పుడప్పుడు కొన్ని వార్తలు కూడా వచ్చాయి. ఇదే తరహాలోనే గూగుల్ భారత్ సీబీఐ ఉచ్చులో బిగుసుకుపోయిందని తాజా సమాచారం!

2013వ సంవత్సరంలో ఈ సంస్థ మ్యాపింగ్ పోటీని నిర్వహించింది. అందులో ప్రజలు వుండే పరసర ప్రాంతాల్ని, ఆసుపత్రుల్ని, రెస్టారెంట్ల వివరాలను మ్యాపింగ్ చేయాల్సిందిగా అది ప్రజలందరినీ కోరింది. అయితే ఇటువంటి కార్యక్రమాలను ప్రారంభించే ముందు దేశంలో వున్న కొన్ని నియమనిబంధనల ప్రకారం భారత సర్వేయర్ జనరల్ కార్యాలయం అనుమతి తీసుకోవాల్సి వుంది. కానీ అటువంటివేమీ తీసుకోకుండానే ‘‘గూగుల్’’ తన పని తాను కానిచ్చేసింది. దీంతో భారత ప్రభుత్వం ఈ సంస్ధపై కన్నెర్రచేసింది.

తాజాగా ఈ వ్యవహారం మీద కేసు నమోదు చేశారు. ‘‘గూగుల్’’లో పొందుపరిచిన మ్యాప్ లను నిశితంగా సీబీఐ పరిశీలించనుంది. అందులో ‘‘గూగుల్’’ నియమనిబంధనల్ని అతిక్రమించి నిషేధిత ప్రాంతాలను కూడా మ్యాపింగ్ చేసేలా ప్రోత్సహించిందని వారు ఆరోపణలు చేస్తున్నారు. ప్రజలకు సంబంధం లేని సున్నితమైన రక్షణ స్థావరాలను ఎలా మ్యాపింగ్ చేశారో తెలియజేయాలని సర్వే ఆఫ్ ఇండియా గూగుల్ కు సూచించింది. ‘‘గూగుల్’’ చేసిన ఈ ఓవరాక్షన్ ను అణిచేందుకు ఈ మొత్తం వ్యవహారాన్ని కేంద్ర హోంశాఖ దృష్టికి తీసుకెళ్లింది. మరీ దీనిపై గూగుల్ ఎలా సమాధానం ఇస్తుందో వేచి చూడాల్సిందే! దీంతో ‘‘గూగుల్’’ భారత్ లో తెరదించుకోవాల్సిందేనని కొంతమంది ప్రతిభావంతులు అభిప్రాయపడుతున్నారు.