విమాన విషాదంలో ప్రధాని అమ్మమ్మ మృతి

Posted: 07/19/2014 01:02 PM IST

నెదర్లాండ్స్ రాజధాని అయిన ఆమ్ స్టర్ డ్యామ్ నుంచి మలేషియా రాజధాని అయిన కౌలాలంపూర్ కు వెళుతున్న బోయింగ్ 777 మలేషియన్ విమానం ఉక్రెయిన్ లో కూలిపోయిన సంగతి తెలిసిందే! అది కూడా ప్రమాదవశాత్తూ కాదు.. ఉక్రెయిన్ విభాగంలో చొరబడిందని ఎయిర్ జెట్ మిస్సైల్ సహాయంతో దురుద్దేశపూర్వకంగానే కూల్చేసినట్లు వార్తలు తెలుపుతున్నాయి. ఇందులో దాదాపు 280 మంది ప్రయాణికులు, 15మంది సిబ్బంది వుండగా.. వారందరూ ఈ దుర్ఘటనలో ఘోరంగా మరణించారు. కనీసం వారి మృతదేహాలను కూడా గుర్తుపట్టని పరిస్థితి!

ప్రస్తుతం తాజా సమాచారం ప్రకారం... ఈ విషాద సంఘటనలో మలేషియా దేశ ప్రధాని నజీబ్ రాజక్ అమ్మమ్మ శ్రీ సిటి అమీరహ్ కూడా వున్నారని వార్తలు వెలువడ్డాయి. ఈ విషయాన్ని మలేషియా రక్షణమంత్రి, ప్రధాని సోదరుడు అయిన హిషమ్ముద్దీన్ హుస్సేన్ స్వయంగా ప్రకటించారు. ఈమేరకు ఆయన తన అమ్మమ్మ మరణవార్త గురించి ట్విటర్ లో తెలుపుతూ.. ఆ ఫోటోను పెట్టారు. అలాగే ఆమె విమానం ఎక్కేముందు కొన్ని విషయాల గురించి చెబుతూ ఆయన తీవ్ర ఆవేదన వ్యక్తం చేశారు.

ఆమె స్వస్థలం ఇండోనేషియా అని, అక్కడి జోగ్ జకార్తా నగరానికి వెళ్లేందుకు వారి అమ్మమ్మ ఆమ్ స్టర్ డ్యామ్ లో విమానం ఎక్కారని ఆయన పేర్కొన్నారు. రంజాన్ పండుగ కొన్ని రోజుల్లోనే వున్న సందర్భంగా ఆమె తన బంధుమిత్రులతో గడిపేందుకు వస్తుండగా... ఈ ఘోర ప్రమాదం జరిగిందని... అందులోనే తమ అమ్మమ్మ వుండటం ఎంతో బాధాకరమైన విషయమని ఆయన తన బాధను వ్యక్తం చేశారు. వారి కుటుంబ సభ్యులు కూడా తమ అమ్మమ్మ చనిపోవడంపై తీవ్ర ఆవేదన వ్యక్తం చేశారు.

AS