చిన్నప్టటినుంచే ఊబకాయం ఆరోగ్య సమస్యలకు ఒక పరిష్కారం

Posted: 07/17/2014 09:29 AM IST

ఒక వైద్యుని డిస్పెన్సరీ వరండాలోనే సమోసాలు, పానీ పూరీ దుకాణం ఉంటే అది చట్టరీత్యా నేరమేమీ కాదు.  కానీ అక్కడ తినండి, ఇలా లోపలికి రండి అని ఆ హాస్పిటల్ యాజమాన్యం చెప్పినట్లుంటుంది.   బయట తిండితో జబ్బులు తెచ్చుకోండి, లోపలికి వచ్చి వైద్యం చేయించుకోండి అని, ఇంకా, బయట డబ్బులు కట్టి రోగాలు తెచ్చుకోండి, లోపల మళ్ళీ డబ్బులు కట్టి వాటిని నయం చేయించుకోండి అన్నట్లు కూడా ఉంటుంది.  అయితే చట్టంలో సవరణ చేస్తే మాత్రం అలాంటివి చట్ట వ్యతిరేకాలవుతాయి.  దేవాలయాలు, విద్యాలయాల పక్కన మద్యం దుకాణాన్ని సమ్మతించరు కదా.  

అలాగే చిన్నప్పటి నుంచే పిల్లలను ఊబకాయులను చేస్తున్న పదార్థాలను విక్రయించే దుకాణాలను పాఠశాలల పక్కన పెట్టనివ్వ గూడదని ప్రభుత్వం నిర్ణయం తీసుకుంది.  పాఠశాలల్లో చదువుకునే చిన్న పిల్లలు బయట లభించే పదార్థాలను తినరాదని పాఠశాల యాజమాన్యం చెప్తుంది.  పెద్దలు కూడా పిల్లలకు జాగ్రత్తలు చెప్పే పంపిస్తారు.  ఏవేవో కలిపి చేస్తారు, శుభ్రంగా చెయ్యరు, ఈగలు వాలుతుంటాయి, దుమ్ము ధూళి పడ్డ పదార్థాలను తింటే జబ్బులు వస్తాయి అంటూ పిల్లలకు చెప్తారు.  కానీ పరిశుభ్రంగా ఉన్నా ఊబకాయం వచ్చే పదార్థాల గురించి మాత్రం చెప్పకపోవటం శోచనీయం.  పైగా ఆధునికత పేరుతో జంక్ ఫుడ్స్ కి అలవాటవటం గమనిస్తూనే ఎక్కువగా చెప్పలేకపోతున్నారు.  

ఇది గమనించే ఉప్పు, పంచదార, కొవ్వు పదార్థాలు ఎక్కువ పాళ్ళల్లో ఉన్న చిరుతిండి, కార్బొనేటెడ్ పానీయాలను పాఠశాలలకు 50 మీటర్ల పరిధిలో పెట్టనీయగూడదని నియమాన్ని తీసుకునిరావటానికి కేంద్ర మాధ్యమిక  విద్యా మండలి సిఫారస్ ప్రకారం కేంద్ర ప్రభుత్వం యోజనలు చేస్తున్నట్టుగా లోక్ సభలో ప్రకటన చేసింది.  వీటి స్థానంలో పండ్ల రసాలు, పాల ఉత్పాదనలు, ఆరోగ్యకరమైన చిరుతిండి విక్రయాలను మాత్రమే అనుమతించాలని నిర్ణయం తీసుకోవటం జరిగింది.  

ఆహార భద్రతా ప్రమాణాల అధికార సంస్థ దీన్ని అధ్యయనం చెయ్యటానికో నిపుణుల సంస్థను అక్టోబర్ 2013 లో ఢిల్లీ హైకోర్ట్ ఆదేశాలమేరకు నియమించటం జరిగింది.  పిల్లలలో చిన్నప్పటి నుంచే ఊబకాయానికి, వివిధ ఆరోగ్య సమస్యలకు జంక్ ఫుడ్స్ కారణమని గుర్తించిందా కమిటీ.

-శ్రీజ