రాజధాని లో ‘గంటా’ అభివృద్ది?

Posted: 06/24/2014 05:59 PM IST

ఆంద్రప్రదేశ్ విద్యాశాఖ మంత్రి గంటా శ్రీనివాసరావు విశాఖ అభివృద్ది పై వేగంగా అడుగులు వేస్తున్నారు. అందులో సీమాంద్ర రాజధాని కోసం గంటా శ్రీనివాసరావు శ్రద్దగా కృషి చేస్తున్నారు. ఆంద్రప్రదేశ్ రాష్ట్ర అభివృద్ది లో బాగంగా సినీ పరిశ్రమ పై గంటా దృష్టి పెట్టారు. విశాఖపట్నంలో సినీ పరిశ్రమను అభివృద్ది చేయటానికి తెలుగుదేశం పార్టీ నిర్ణయం తీసుకుందని ఆయన అన్నారు.

విశాఖలో అరకు, భీమిలి ప్రాంతాలలో సినీ షూటింగ్ స్పాట్లు ఏర్పాటు చేస్తున్నామని ఆయన అన్నారు . ఇందుకోసం టాలీవుడ్ సినీ నిర్మాతలు, దర్శకులు, నటులు అందరు సహకరించాలని ఆయన కోరారు. అంతేకాకుండా విశాఖ పట్నంలో కొత్తగా ఇంటర్నేషనల్ ఎయిర్ ఫోర్ట్ ను త్వరగా నిర్మించాలని కోరుతూ కేంద్రానికి ప్రతిపాదనలు పంపుతున్నామని ఆయన తెలిపారు. అలాగే విశాఖ అభివృద్ధి లో భాగంగా మెట్రో రైలు ను ఏర్పాటు చేయనున్నామని, ఇందుకోసం కొత్తగా టెండర్లను కూడా ఆహ్వానించినట్లు గంటా వెల్లడించారు.

అయితే విశాఖ పట్నం ను ఆర్దిక రాజధాని చేస్తామని పంచాయతీ రాజ్ శాఖ మంత్రి అయ్యన్న పాత్రుడు ఇది వరకే తెలిపారు. అంతేకాకుండా విశాఖపట్నంలో ట్రైబల్ యూనివర్సిటీని ఏర్పాటు చేయనున్నట్లు, అలాగే 200 పడకల సామర్ద్యం ఉన్న విశాఖ ఇన్స్టిట్యూట్ ఆఫ్ మెడికల్ సైన్సెస్ ను రూ. 60 కోట్ల నిధులతో ఏర్పాటు చేస్తామని, విశాఖ ను కాలుష్య రహిత నగరంగా నిర్మిస్తామని అయ్యన్న పాత్రుడు తెలిపిన సంగతి తెలిసిందే.

విశాఖలో గంటా అభివృద్ది వేగవంతంగా జరగాలని సీమాంద్ర ప్రజలు కోరుకుంటున్నారు. అయితే ముందుగా సీమాంద్ర ప్రజలు చంద్రబాబు కు సహకరించాలని ..టిడిపి మంత్రులు కోరుతున్నారు. రాజకీయ పార్టీలు కూడా సీమాంద్ర అభివృద్ది కోసం కలిసి వస్తే, సీమాంద్రను సింగపూర్ చేయటానికి ఎంతో సమయం పట్టదని రాజకీయ మేథావులు అంటున్నారు. మంత్రి గంటా శ్రీనివాసరావు చేపట్టిన కార్యక్రమాలు విజయవంతం కావాలని ఆయన అభిమానులు కోరుకుంటున్నారు.