భారత్ ఇంజినీరింగ్ కి అంతర్జాతీయ గుర్తింపు

Posted: 06/14/2014 10:02 AM IST

India gets permanent membership in washington accord

వాషింగ్టన్ అకార్డ్ లో భారతదేశానికి సభ్యత్వం లభించటంతో దేశంలో ఇక ఇంజినీరింగ్ చేసిన వారికి అంతర్జాతీయంగా గుర్తింపు వచ్చి 17 దేశాలలో నేరుగా ఉద్యోగావకాశాలు వచ్చే అవకాశం కలుగుతోంది. 2007 నుంచి వాషింగ్టన్ అకార్డ్ లో తాత్కాలిక సభ్యత్వం కలిగివున్న భారత్ ఇప్పుడు శాశ్వత సభ్యత్వాన్ని పొందటంతో ఈ మార్పు కలుగుతోంది.

అమెరికాలో శుక్రవారం ఉదయం వెల్లింగ్టన్ లో జరిగిన అంతర్జాతీయ ఇంజినీరింగ్ అలయన్స్ సమావేశంలో భారతదేశాన్ని తమ కూటమిలో చేర్చుకోవాలనే ప్రతిపాదనకు వోటువేసారు. దానితో భారత్ కి శాశ్వత సభ్యత్వం లభించింది. అయితే సభ్యదేశాలు అకార్డ్ నిర్దేశించే ప్రమాణాలను పాటించవలసివుంటుంది.

శాశ్వత సభ్యత్వం రావటం కోసం మానవవనరుల అభివృద్ధి శాఖ అధికారులు చేసిన కృషిని ఆ శాఖ మంత్రి స్మృతి ఇరానీ ప్రశంసించారు. మన దేశంలో ఇంజినీరింగ్ చేసిన వారికి అంతర్జాతీయంగా అవకాశాలు రావటానికి ఉన్నత స్థాయి ప్రమాణాలతో ఇంజినీరింగ్, టెక్నికల్ విద్యా కార్యక్రమాలను రూపొందించాలని, దానితో వారికి ప్రపంచవ్యాప్తంగా ఉపాధి అవకాశాలు పెరుగుతాయని ఆమె అన్నారు.

మానవవనరుల మాజీ మంత్రి పళ్ళం రాజు కూడా స్పందిస్తూ, మంత్రిత్వ శాఖ ఏడు సంవత్సరాలుగా చేసిన కృషి ఫలించిందని, వాషింగ్టన్ అకార్డ్ లో శాశ్వత సభ్యత్వం పొందటం ఆనందం కలిగిస్తోందని ట్విట్టర్లో పోస్ట్ చేసారు.

శాశ్వత సభ్యత్వం మీద వోటు వెయ్యటానికి ముందు అంతర్జాతీయ నిపుణుల బృందం భారత్ లో పర్యటించి ఇక్కడి ఇంజినీరింగ్ విద్యా ప్రమాణాలను డిసెంబర్, జనవరి నెలల్లో పరిశీలించి మార్చిలో నివేదికను సమర్పించారు. దాని మీద వోటింగ్ శుక్రవారం నాడు జరిగింది.

-శ్రీజ