Posted: 03/07/2013 05:38 PM IST

ఆత్మ విశ్వాసమే లేని మనిషికి పరమాత్మ మీద భక్తి విశ్వాసాలు ఎలా ఉంటాయి? – స్వామి వివేకానంద

కనిపించని దేవుడిని నమ్మటం కష్టమే.  తన మీద తనకే నమ్మకం లేని మనిషికి అది మరీ అసాధ్యమే అవుతుంది.  ఆత్మవిశ్వాసం ఉంటేనే ఆత్మధైర్యం ఉంటుంది.  ఆత్మధైర్యం ఉన్నవాళ్ళకే చేసే పనులలో సామర్ధ్యం, చేసిన తర్వాత ఆత్మతృప్తి కలగటం ఉంటాయి.  అలాంటి మౌలికమైన ఆత్మవిశ్వాసమే లేనప్పుడు, మనిషి తనమీద తానే నమ్మకాన్ని కోల్పోయి ఉన్నప్పు కనిపించని దేవుడిని ఎలా నమ్మగలడు? 

దేవుడు లేడు అంటే అర్థం నేను లేను అనే.  ప్రతి మనిషిలో ప్రతి జీవిలో ప్రతి ప్రాణిలో అణువణువునా సృష్టంతా నిండి ఉన్న చైతన్యమే బ్రహ్మమంటే.  సర్వవ్యాపకుడూ, సర్వశక్తివంతుడూ, సర్వఙుడూ, సర్వంలోనూ అంతర్లీనమై అంతర్వాహినిలా ఉన్న శుద్ధచైతన్యాన్ని లేదు అని అనటమంటే నేను లేను అని అనుకోవటమే అవుతుంది.  ఆ దివ్య చైతన్యమే మనలను నడిపించేది.  చైతన్యమున్నంత సేపూ శివమే కానీ ఆ చైతన్యం వీడిపోగానే శవం అవుతాం.  ఈ మాటనే వ్యతిరేక దిశలో చెప్పారు స్వాని వివేకానంద.

దేవుడు లేడు అంటే నేను లేను అని కాకుండా, నేను అనే దానిమీద నమ్మకం లేకపోతే ఇక ఆ నేను లోపల ఉన్న చైతన్యాన్ని, బ్రహ్మను అంటే పరమాత్మను నమ్మటం ఎలా కుదురుతుంది అని అంటారాయన.  ఉన్నదీ లేదూ అన్నది మనలోనే ఉంటుంది.  మనమెలా అనుకుంటే అలా.  అందుకే ఎంతవారు ఎంత అనుకుంటే అంతే నీవు అని అన్మమయ్య పాటలో స్తుతిస్తాడు.  వేంకటేశ్వరుడనుకుంటే వేంకటేశ్వరుడు, బాలాజీ కాదు శక్తి స్వరూపం బాలా త్రిపురసుందరీ దేవి అంటే ఆయన అలాగే పలుకుతాడు.  అదే భగవంతుడిని వైష్ణవులు, శాక్తేయులు, శైవులు ఎవరైనా వారికిష్టమైన రూపంలో చూసుకుంటూ ఇష్టమైన పేరుతో పిలుచుకోవచ్చు.  అలాగే, మనం కోరుకున్నట్టుగా ఉండే భగవంతుడు 'లేడు' అని నమ్మేవాళ్లకి నిజంగానే ఆయన లేడు- ఉండడు కూడా.

-శ్రీజ