Posted: 02/27/2013 03:48 PM IST

మహా కవి, యోగి, శాంతి దూత రవీంద్రనాథ టాగూర్ 1913 లో తను రాసిన గీతాంజలి పుస్తకానికి నోబెల్ సాహిత్య పురస్కారాన్ని అందుకున్నారు.  యూరోపియనేతరులకు నోబెల్ పురస్కారం అందటం అదే మొదటిసారి.

సామాన్యంగా బాధలనుంచి రక్షించమనీ, కాపాడమని దేవుడిని ప్రార్థిస్తారు.  కానీ, బాధలను తీసెయ్యమని కాకుండా, ఆ బాధలను ఎదుర్కునే ధైర్యాన్నివ్వమని ప్రార్దించమంటారు టాగూర్. 

బాధలు తీసెయ్యమంటే అర్థం, ఆ కష్టాలు గట్టెక్కటానికి కావలసిన వనరులను ఇవ్వమని, దానితో నేనే ఆ కష్టాలనుంచి బయటపడతానని చెప్పటం అవుతుంది.  అలాకాకుండా, ఆ కష్టాలను ఎదుర్కునే ధైర్యాన్నివ్వమని ప్రార్థించమంటున్నారు కానీ శక్తి సామర్థ్యాలివ్వమని కాదు.  శక్తి సామర్థ్యాలు, వనరులు ఉంటే మనం మన కృషితో బయట పడటమెలా అవుతుంది

బాధలు, కష్టాలు వాస్తవానికి మానవునికి పరీక్షలు.  అందుకే బాధలు కలిగినప్పుడు దేవుడు పరీక్ష పెడుతున్నాడు అనేవారు పూర్వకాలం.  పరీక్షల నుంచి బయటపడటానికి రెండు మార్గాలున్నాయి.

ఒకటి, వాటిని తప్పించుకుని పరీక్షలకు పోకుండా ఉండటం, రెండు, పరీక్షలు రాసి ఉత్తీర్ణులవటం.  రెండిటిలో ఏది చేసినా పరీక్షల నుంచి బయటపడతాం.  కానీ మొదటిది చేస్తే ప్రస్తుతానికి అవి ఇబ్బంది పెట్టకపోయినా ఎప్పుడో ఒకప్పుడు మళ్ళీ మన జీవితంలో తారసపడతాయి.  అదే ఆ పరీక్షల నుంచి ఉత్తీర్ణులవుతే మరోసారి ఆ పరీక్షలు మనకు ఎదురవవు.  కాబట్టి ఆ రెండిటిలో ఏది శ్రేయస్కరమన్నది స్పష్టంగా ఉంది. 

అసలు పరీక్షలెందుకు ఉంటాయి.   మనమే స్థాయిలో ఉన్నామో తెలుసుకోవటానికి.  మనకి మనకీ తెలుస్తుంది, మనకి మార్కులు వేసేవారికి- అంటే మన స్థాయిని నిర్ణయించే అధికారం ఉన్నవాళ్ళకీ తెలుస్తుంది.  మనమే స్థాయిలో ఉన్నామో తెలిస్తే మనలను మనం అభివృద్ధి చేసుకోగలం.  మన గురించి మనకే తెలియకపోతే ఎప్పటికీ ఆ తెలియని స్థాయిలోనే ఉండిపోతాము. 

అందుకే పరీక్షలు అవసరం.  వాటి నుండి గట్టెక్కించండి అని అధ్యాపకుడిని కోరితే, ఆయనకెంత సేపు పని.  కానీ దానివలన మీ స్థాయిలో మార్పు రాదు కదా.  అందువలన మనం కోరుకోవలసిందేమిటంటే, పరీక్షలు రాయటానికి అవసరమైన కృషి చెయ్యటంలో మార్గదర్శనం, ప్రోత్సాహం.  అదే ధైర్యాన్ని ఇవ్వమని అడగటమంటే.  

అందుకే భగవంతుడిని కూడా, కష్టాల నుంచి గట్టెక్కించమని కాకుండా, కష్టాలను ఎదుర్కునే ధైర్యాన్ని ప్రసాదించమని కోరుకోమని టాగూర్ చెప్తున్నారు.

-శ్రీజ