యూటీ చేస్తే విభజనకు సహకరిస్తాం ?

Posted: 11/27/2013 11:44 AM IST

రాష్ట్ర విభజన అంశం తుది ఘట్టానికి చేరుకున్న తరుణంలో సీమాంధ్ర ప్రాంతానికి చెందిన కేంద్ర మంత్రులు చివరి వరకు తమ ప్రయత్నాలు చేసుకుంటూనే పోతున్నారు. నేడు ఉదయం ఢిల్లీలో కేంద్ర మంత్రి జైరాం రమేష్ తో సీమాంధ్ర ప్రాంతానికి చెందిన కేంద్రమంత్రులు చిరంజీవి, కోట్ల సూర్య ప్రకాష్ రెడ్డి, పురందేశ్వరి, కిల్లి క్రుపారాణి, జేడీ శీలం, పనబాక లక్ష్మీ సమావేశం అయ్యారు.

ఈ సమావేశంలో పలు విషయాలను గురించి చర్చించినట్లు సమావేశం తరువాత మంత్రులు మీడియాతో చెప్పారు. కేంద్రమంత్రి చిరంజీవి మాట్లాడుతూ... రాష్ట్ర విభజన అనివార్యమని, అందువల్ల సీమాంధ్ర ప్రజలు కూడా అంగీకరించాలని, హైదరాబాద్ పై అందరికి భావోద్వేగాలు ఉన్నాయి కాబట్టి ఎట్టి పరిస్థితుల్లోనూ యూటీ చేయాల్సిందేనని, రాజీపడే ప్రసక్తి లేదని , హైదరాబాద్ ను యూటీ చేస్తే సీమాంధ్రులు విభజనకు అంగీకరించాలని, భధ్రాచలం ను తూర్పుగోదావరి జిల్లాలోనే ఉంచాలని చెప్పినట్లు తెలిపారు.

సీమాంధ్రకు ప్రత్యేక రైల్వే డివిజన్ ను ఏర్పాటు చేయాలని, యూటీ చేస్తే విభజనకు అంగీరిస్తామని జేడీ శీలం తెలపగా, కొత్తరాజధానికి అవసరమైన నిధులు, స్థలం కేటాయించాలని, నీటి విషయమై నిపుణుల కమిటీ వేయాలని కోరినట్లు చెప్పారు. వీరందరి వాదలను విన్న కేంద్ర మంత్రి జైరాం రమేష్ సీమాంధ్ర ప్రాంత సమస్యలనే సీరియస్ గా పరిశీలిస్తున్నామని చెప్పారు.