రాజకీయాలకు బాలయ్య రాం..రాం..

Posted: 11/23/2013 11:26 AM IST

ప్రముఖ సినీ నటుడు నందమూరి బాలక్రిష్ణ పై రాజకీయాల్లో ఓ ఆసక్తి కరమైన చర్చసాగుతుంది. బాలయ్య 2014 లో ప్రత్యక్ష రాజకీయాల్లోకి వచ్చి కృష్ణా జిల్లా నుండి పోటీ చేసి అసెంబ్లీలో తన బావ చంద్రబాబు ప్రక్కన కూర్చోవాలని ఆశపడుతున్నట్లు గత కొన్ని రోజుల నుండి ప్రచారం జరిగిన విషయం తెలిసిందే. ఆ మధ్య కూడా బాలయ్య తాను రాజకీయ అరంగ్రేటం చేయబోతున్నట్లు చెప్పారు కూడ. కానీ ఇప్పుడు బాలయ్య రాజకీయాల్లోకి రావడం లేదని, ఆయన రాజకీయాల పై అలిగి రాం రాం చెప్పాడని అంటున్నారు.

ఇటీవల ఓ వివాహ కార్యక్రమానికి హాజరైన బాలయ్యను రాజకీయాల పై విలేఖరులు కొన్ని ప్రశ్నలు అడిగితే వారి పై చిరాకు పడటమే కాకుండా, తాను రాజకీయాలకు దూరంగా ఉంటానని,తనతో వాటి గురించి మాట్లాడవద్దని అన్నట్లు తెలుగు దేశం పార్టీలో ఓ నాయకుడు తెలిపారు. బాలయ్య ఇలా రాజకీయాల పై అలగడానికి తన బావ చంద్రబాబే కారణం అనే ప్రచారం జరుగుతుంది తెలుగు దేశం వర్గాల్లో. బాలయ్య ఎంతో ఆశపడ్డ పెనమలూరు లేదా మరో శాసనసభ స్థానం నుంచి పోటీ చేయాలని ఉత్సాహపడ్డారు.

కాని చంద్రబాబు నాయుడు అందుకు సుముఖంగా లేరని ,ఆ విషయాన్ని తన కుమారుడు, బాలకృష్ణ అల్లుడు అయిన లోకేష్ ద్వారా చెప్పించి , పోటీకి దూరంగా ఉండేలా చేశారని దాంతో హర్ట్ అయిన బాలయ్య రాజకీయాలకు దూరంగా ఉండటమే మంచిదని నిర్ణయించుకొని, అప్పుడప్పుడు ఏ దర్శకుడుడైనా తనతో సినిమా చేయడానికి ముందుకు వస్తే నాలుగు డైలాగులు చెప్పుకొని, రెండు ఫైట్లు చేసుకొని హాయిగా ఉండక, ఈ రంకు రాజకీయాలతో నాకు ఏం పని అని తన సన్నిహితులతో చెప్పి సైలెంట్ అయ్యాడని అంటున్నారు.

కనీసం 2014 ఎన్నికల్లో బావ తరుపున పార్టీకి ప్రచారం చేస్తాడా అంటే అది కూడా ఉండక పోవచ్చని అంటున్నారు. అయితే ఆయన అభిమానులు మాత్రం బాలయ్య రాజకీయ బురద అంటించుకోకపోవడమే మంచిదని అంటున్నారు.