గన్నవరం నుండి బాలయ్య పోటీ

Posted: 09/18/2013 09:17 AM IST

నందమూరి నటసింహంగా పేరు సంపాదించిన సినీ నటుడు బాలయ్య గత కొంత కాలంగా ప్రత్యక్ష రాజకీయాల్లోకి రాబోతున్నట్లు వార్తలు వస్తున్న విషయం తెలిసిందే. 2014 ఎన్నికల్లో పోటీ చేసి గెలిచి అసెంబ్లీలో అడుగుపెట్టాలని బాలయ్య ఎప్పటి నుండో కలలు కంటున్నాడు. ఇప్పుడు ఎన్నికల టైం దగ్గర పడటంతో బాలయ్యను ఏ నియోజక వర్గం నుండి బరిలో దించితే సేఫ్ గా ఉంటుందని పార్టీ అధిష్టానం ద్రుష్టి సారించింది. చంద్రబాబుకు వియ్యంకుడు అయిన బాలయ్యను బరిలో దించితే ఖచ్చితంగా గెలిపించాలి కాబట్టి ఆయనకు ఏ ఇబ్బంది లేకుండా గెలిచే నియోజక వర్గం కోసం అన్వేషిస్తున్నారు. మొదట ఆయన్ను లోక్ సభకు పంపించాలని భావించారు. కానీ ఆయన సరేమిరా అనడంతో, మొదట గుడివాడ నుంచి పోటీచేస్తే , గతంలో తన తండ్రి దివంగత మాజీ ముఖ్యమంత్రి ఎన్.టి.ఆర్.వారసుడిగా రాజకీయంలో ఉన్నట్లు అవుతుందని భావించారు.కాని అక్కడ ఎమ్మెల్యే కొడాలి నాని వై.ఎస్.ఆర్.కాంగ్రెస్ లోకి వెళ్లడం, వీరిద్దరి మధ్య సవాళ్లు,ప్రతి సవాళ్లు రావడంతో అది అంత సేఫ్ కాదని భావించారు. ఆ తర్వాత పెనమలూరు నియోజకవర్గంపై దృష్టి పెట్టారు.

కానీ ఇప్పుడు తాజాగా అందుతున్న సమాచారం ప్రకారం.... కృష్ణా జిల్లా గన్నవరం నియోజక వర్గం నుంచి శాసనసభకు పోటీ చేసేందుకు ఏర్పాట్లు మొదలుపెట్టినట్లు సమాచారం. ఇందుకోసం సిట్టింగ్ ఎమ్మెల్యే దాసరి బాలవర్ధన్ రావుకు కృష్ణా జిల్లా కో-ఆపరేటివ్ మిల్క్ డైరీ(విజయ డైరీ) పాలక మండలిలో బెర్త్ ఖాయం చేసి బాలయ్యకు లైన్ క్లియర్ చేసే ఆలోచనలో ఉన్నట్లు చెబుతున్నారు. గన్నవరం నియోజవర్గంలో కమ్మ వర్గం బలంగా ఉన్న కారణంగా అక్కడ్నుంచి పోటీ చేస్తే గెలవడం ఖాయమన్న భావనతో బాలకృష్ణ ఆ స్థానం నుంచే పోటీ చేసేందుకు సుముఖత వ్యక్తం చేసినట్లు సమాచారం. టిడిపి ఆవిర్భావం తర్వాత ఆ పార్టీకి గణనీయమైన క్యాడర్ ఉన్న నియోజక వర్గంలో బాలయ్య గెలుపు నల్లేరు మీద నడక అవుతుందో లేదో చూడాలి.