శిశువు అపహరణ, పోలీసు చాకచక్యంతో కథ సుఖాంతం

Posted: 08/19/2013 10:19 AM IST

ఆదివారం ఉదయం గాంధీ హాస్పిటల్ నుంచి ఆ రోజే జన్మించిన శిశువుని  తస్కరించి జన్మభూమి రైలు ఎక్కి ఉడాయిస్తున్న మహిళను పోలీసులు చాకచక్యంగా అదుపులోకి తీసుకున్నారు.

హైద్రాబాద్ బోరబండకు చెందిన మనోహర్ సుమిత్ర దంపతులకు సికింద్రాబాద్ గాంధీ హాస్పిటల్ లో జన్మించిన మగ శిశువును బుజ్జి అని పేరు చెప్పుకున్న ఒక మహిళ అపహరించింది.  మంచి మాటలతో నెమ్మదిగా దంపతులకు చేరువైన బుజ్జి చిన్నచిన్న పనులు, సాయం చేసి పెట్టి నమ్మకాన్ని చూరగొన్న తర్వాత శిశువు విషయంలో డాక్టర్ ని సంప్రదించి వచ్చే నెపంతో శిశువుని తీసుకుని వెళ్ళింది.  ఆమె ఎంతకీ రాకపోయే సరికి అనుమానం వచ్చి చూస్తే ఎక్కడా కనిపించకపోయేసరికి మనోహర్ చిలకలగూడ పోలీస్ స్టేషన్లో ఫిర్యాదు చేసారు.

పోలీసులు వెంటనే స్పందించి రైల్వే స్టేషన్లోని సిసి కేమెరాల ఫుటేజ్ ని పరిశీలించి మనోహర్ సాయంతో బుజ్జి గుర్తు పట్టారు.  ఆమె జన్మభూమి ఎక్స్ ప్రెస్ లో ఎక్కడం గమనించిన పోలీసులు రైల్వే పోలీసులను అప్రమత్తం చెయ్యగా పోలీసులు చాకచక్యంగా ఆమెను తెనాలి లో పట్టుకున్నారు. 

తెనాలిలో శిశువు సంరక్షణ విషయంలో కూడా జాగ్రత్త తీసుకోవటం వలన శిశువు ఆరోగ్యంగా ఉన్నట్లుగా చెప్తున్నారు. 

మొత్తానికి, పోలీసులు తలచుకుంటే తమకున్న యంత్రాంగంతో ప్రజలకు మంచి సేవలందించగలరని ఈ సంఘటన నిరూపిస్తోంది.  అయితే ఇక్కడ కావలసినవేమిటంటే, నిర్భయంగా పోలీస్ స్టేషన్ కి వెళ్ళి రిపోర్ట్ ఇవ్వటం, అలాగే పోలీస్ స్టేషన్లో సంశయం లేకుండా ఫిర్యాదులను చేపట్టటం, పోలీస్ స్టేషన్లో అవసరమైన సిబ్బంది ఉండటం.  ప్రస్తుతం ఆ ప్రాంతంలో ఎటువంటి బంద్ లు, లేక పోలీసులు చెయ్యవలసిన బందోబస్తులు లేకపోవటం వలన, ఈ కేసులో రాజీకీయ కోణంలో ఇబ్బందులేమీ తలెత్తవనే నమ్మకం పోలీసులలో ఉండటం వలన కథ సుఖాంతమైంది.  పై వాటిలో ఏ ఒక్కటి లోపించినా ఇలా జరిగుండేది కాదు.  జాగ్రత్తగా ఉండొద్దా, కొత్త వాళ్ళని ఎలా నమ్మారు అనే ఎదురు ప్రశ్నలు మాత్రమే ఆ దంపతులకు మిగిలివుండేవి.

-శ్రీజ