టీ పై మాట మార్చిన దిగ్గీ

Posted: 07/12/2013 08:02 AM IST

ఆంధ్రప్రదేశ్‌ కాంగ్రెస్‌ వ్యవహారాల ఇన్‌చార్జీ దిగ్విజయ్‌ సింగ్‌ తెలంగాణా అంశం మీద చేసిన వ్యాఖ్యలు ఆపార్టీ మనోగతానికి అద్దం పడుతున్నాయి. ఈమొత్తం వ్యవహారంలో కాంగ్రెస్‌ పాత్ర చాలా స్వల్పమని ఆయన చెప్పదలుచుకున్నట్లు అర్ధమవుతోంది. కాకపోతే ఆ విషయాన్ని నేరుగా చెప్పకుండా తెలంగాణా బంతిని యూపీయేతో బాటు విపక్షాల కోర్టులోకి నెట్టారు. ఇదే సమయంలో ఆయన ప్రకటనతో అనేక కొత్త సందేహాలు తలెత్తుతున్నాయి. తెలంగాణా కోసం రాజ్యాంగ సవరణ చేయాల్సి ఉంటుందన్నది రాజకీయ నేతల్లో అయోమయాన్ని సృష్టిస్తోంది. గతంలో రాష్ట్రాల విభజన జరిగిన సందర్భాల్లో లేని రాజ్యాంగ సవరణ ఆవశ్యకత ఇప్పుడెందుకు వస్తోందన్నది అంతు చిక్కడం లేదని తెరాస నాయకుల దగ్గర్నుంచి వివిధ పార్టల నేతలు అంటున్నారు. అదే విధంగా ముఖ్యమంత్రి, ఉప ముఖ్యమంత్రి, పీసీసీ అధ్యక్షుడు తయారు చేసిన రోడ్‌ మ్యాప్‌లు రాష్ట్ర విభజన అంశం మీద కాదన్న అనుమానం రేకెత్తుతున్నది. 2014లో జరగనున్న లోక్‌సభ, అసెంబ్లి ఎన్నికలకు రాజకీయ వ్యూహంతో రోడ్‌ మ్యాప్‌ తయారుచేయమని చెప్పినట్లు దిగ్విజయ్‌ తాజాగా చేసిన ప్రకటన మరింత గందరగోళానికి దారి తీసింది. ఇంతకూ కోర్‌ కమిటీలో ఎన్నికల రాజకీయ వ్యూహం మీద చర్చిస్తారా లేక తెలంగాణాను విడగొట్టాలా వద్దా అన్న అంశం మీద చర్చిస్తారా అన్నది సందిగ్దంగా మారింది. సందిగ్దతను తొలగిస్తామని దిగ్విజయ్‌ ప్రకటించినా, ఆయన మాటలు ఇప్పటికే ఉన్న సందిగ్దతను రెట్టింపు చేశాయి.