పంచాయతీల వేలం

Posted: 07/11/2013 06:17 PM IST

ఎన్నికల వేడి పంచాయతీ స్థాయిలో విచిత్రంగా సాగుతోంది.  సర్పంచ్ పదవులకు ఎన్నికలు కాక వేలం ద్వారా అమ్మకాలు జరుగుతున్నాయి.  ఆ గ్రామాల్లో వేలం ద్వారా కొనగలిగే వాళ్ళే ఆ పదవిని సంపాదించుకోగలగుతారు కానీ ఎన్నికల అధికారులు నిర్వహించే ఎన్నికల విధానంలో కాదు.  అంటే ప్రజలు ఎన్నుకునేవాళ్ళు కాక డబ్బుతో కొనగలిగేవాళ్ళే ఆ పదవులను అందుకుంటారు. 

ఎన్నికల్లో ఎలాగూ డబ్బు ఖర్చు పెట్టాలి.  అదేమీ లేకుండా డబ్బునే ఫణంగా పెట్టి సర్పంచ్ పదవిని కొట్టేస్తే ఏ బాదరబందీ ఉండదని వాళ్ళ భావన.  వేలం పాటలో పదవిని గెల్చుకున్నవాళ్ళు పాట సొమ్మును చెల్లించగా ఇతర అభ్యర్థులు బరిలోనుంచి తప్పుకుంటారు, ఎన్నికలు ఏకగ్రీవమవుతాయి.  ఆలోచన చాలా బావుంది.  ఎలాగూ డబ్బుతో కొనేదే కాబట్టి ఇలా కొనేస్తే గొడవ లేని పనని గ్రామస్థాయిలో నాయకులు కనిపెట్టేసారు.

కానీ ఇది ప్రజాస్వామ్య పద్ధతికి వ్యతిరేకం.  అందువలన ఎన్నికల అధికారి నవీన్ మిట్టల్ అటువంటివి జరగకుండా చూస్తూ, ఈ లోగా వేలం నిర్వహించిన వారిమీద కేసులు నమోదు చెయ్యమని పోలీసులకు ఆదేశాలిచ్చారు.  ఇవి బయటకు వచ్చిన కేసులు.  ఇంకా ఎన్ని ఉన్నాయో తెలియవు కాబట్టి ఏ గ్రామంలోనైతే పోటీలేకుండా ఏకగ్రీవంగా ఎన్నికలు జరుగుతాయో అక్కడంతా విచారణ చేపడతామని, ఫలితాలను ఆ తర్వాతనే వెల్లడిస్తామని ఆయన అన్నారు.

ఇప్పటి వరకు రెండు పంచాయతీల మీద కేసులు పెట్టారు.  మరో పంచాయతీ మీద కేసు పెట్టమని నవీన్ మిట్టల్ పోలీసులకు అదేశాలిచ్చారు.  వరంగల్ జిల్లాలో అకల్చాడ గ్రామంలో ఎనిమిది మందిని, కరీం నగర్ జిల్లా కొత్తపల్లి లో 17 మందిని వేలం నిర్వహిస్తుండగా పట్టుకుని కేసులు పెట్టి వాళ్ళని అరెస్ట్ చేసారు.

ఇంతవరకూ అందిన నామినేషన్ల సంఖ్యను వెల్లడిస్తూ, సర్పంచ్ పదవికోసం 20994 నామినేషన్లు, వార్డు సభ్యత్వం కోసం 51961 నామినేషన్లు అందాయని తెలియజేసారు.

-శ్రీజ