ఢిల్లీ బాటలో సీనియర్ మంత్రులు?

Posted: 06/04/2013 12:48 PM IST

ఒక్క మంత్రి పై వేటు వేయటంతో .. కాంగ్రెస్ పార్టీ సీనియర్సీనియర్ మంత్రుల్లో అలజడి మొదలైంది. అధిష్టానం ఎప్పుడు ఎవరి మీద వేటు వేస్తుందోనని భయంతో వణికిపోతున్నారు. ఆ భయంతో అందరు ఢిల్లీ బాట పట్టారు. పిసిసి అధ్యక్షుడు బొత్స సత్యనారాయణ, పంచాయతీరాజ్‌ శాఖ మంత్రి కె. జానారెడ్డి ఇప్పటికే ఢిల్లీకి చేరుకొని పార్టీ అంతర్గత వ్యవహారాలపై అధిష్టానంతో చర్చలు జరుపుతున్నారు. అధిష్టానం పిలుపు మేరకే పార్టీ వ్యవహారాలు చర్చించడానికి పిసిసి అధ్యక్షుడు బొత్స సత్యనారాయణ ఢిల్లీకి చేరుకున్నారు. తెలంగాణ, ప్రభుత్వ అంతర్గత వ్యవహారాలు చర్చించడానికి పంచాయతీరాజ్‌ శాఖ మంత్రి కె. జానారెడ్డి ఢిల్లీకి వెళ్లారు.

అధిష్టానం నిర్ణయం మేరకే డి.ఎల్‌. రవీంద్రారెడ్డిపై వేటు పడిందని భావిస్తున్న అసమ్మతి వాదులు తాము మరో డి. ఎల్‌. కాకూడదనే ఆలోచనతోనే అధిష్టానాన్ని ప్రసన్నం చేసుకొనేందుకు ఢిల్లీకి పయనమవుతున్నారు. ముఖ్యమంత్రిపై విమర్శలు సంధించిన డి.ఎల్‌. రవీంద్రారెడ్డిపై వేటు పడటంతో కిరణ్‌ సర్కార్‌లోని అసమ్మతి వాదులు ఉలిక్కిపడుతున్నారు. ఉప ముఖ్యమంత్రి దామోదర రాజనరసింహ, ఒకరిద్దరు సీనియర్‌ మంత్రులు ఢిల్లీకి వెళ్లే అవకాశం ఉంది.

అధిష్టానాన్ని ప్రసన్నం చేసుకొనేందుకే ఢిల్లీ వెళ్లాలని నిర్ణయించుకున్నట్లు తెలిసింది. ఇద్దరు మంత్రులతో రాజీనామాలు చేయించడం, మరో సీనియర్‌ మంత్రిని బర్తరఫ్‌ చేయడం, ఇద్దరు ఎంపీలు తెరాసలో చేరినా పట్టించుకోని పరిణామాలతో అసమ్మతి వాదులు భయాందోళనకు గురవుతున్నారు. అధిష్టానం రాష్ట్ర వ్యవహారాలపై సీరియస్‌గా ఉందన్న బావన వారిలో ప్రబలంగా ఏర్పడింది. సీనియర్‌ మంత్రి డాక్టర్‌. డి.ఎల్‌. రవీంద్రారెడ్డిని బర్తరఫ్‌ చేసిన తీరు సహేతుకంగా లేదని పార్టీ సీనియర్లు, పలువురు రాష్ట్ర మంత్రులు భావిస్తున్నప్పటికీ, అది అధిష్టానం నిర్ణయం కావడంతో ఢిల్లి స్థాయిలో అసంతృప్తిని వ్యక్తం చేసే సాహసం చేయలేకపోతున్నారు. అధిష్టానం వైఖరి వల్లనే పార్లమెంటు సభ్యులు పార్టీకి దూరమయ్యారన్నది వారి భావన.